Верагодна, гэта звязана з умовай напісаць прашэнне аб памілаванні.
Некаторыя палітвязні адмовіліся выходзіць на волю 3 ліпеня, не пагадзіўшыся з умовамі вызвалення, паведамляе праваабарончы цэнтр «Вясна».
«Верагодна, гэта звязана з тым, што частка палітвязняў выйшлі на волю па памілаванні – ім прыйшлося пісаць прашэнне на імя Лукашэнкі. Вядома, што замест гэтых людзей выйсці на волю прапанавалі іншым палітвязням. Таксама паведамляецца, што працэдура вызвалення адбывалася вельмі хутка – некаторым нават не далі сабраць свае рэчы», – кажуць праваабаронцы.
Праваабаронцам дакладна вядома пра 18 палітзняволеных, якія 3 ліпеня выйшлі на волю. Сярод іх – 4 жанчыны і 14 мужчынаўу тым ліку асуджаны да 10 гадоў калоніі і хворы на анкалогію Рыгор Кастусёў.
Кіраўнік фонду «BYSOL» Андрэй Стрыжак расказаў, што на волю выйшлі не толькі хворыя людзі і палітвязні сталага ўзросту:
«З таго, што нам вядома датычна гэтых 15–16 чалавек, сур’ёзны анкалагічны дыягназ пацверджаны толькі ў Рыгора Кастусёва. Але падкрэслю, што гэты працэс працягваецца. Мажліва, у хуткім часе пабачым новыя прозвішчы з гуманітарнага спісу».
Праваабаронцы адзначаюць, што падтрымліваюць інфармацыйную цішыню дзеля бяспекі вязняў, таму пакуль не публікуюць прозвішчаў астатніх вызваленых.
Арсен Рудэнка belsat.eu
