У інтэрнэт-краме кампаніі адзін дрон Chimera CX10 каштуе $329,99. Аднак беларускае мінабароны плануе пакупаць беспілотнікі па $8951.
Паводле звестак «Беларускі Гаюн», Міністэрства абароны Беларусі плануе новыя закупкі дронаў для войска. Да канца 2024 года ведамства плануе закуп 16 дронаў Chimera CX10 вытворчасці iFlight (Кітай).
Chimera CX10 – гэта 10-цалевы FPV-дрон, які можа развіваць хуткасць да 140 км/г і вытрымліваць нагрузку да 2,5 кг. Максімальная вышыня ўзлёту – 6 тысяч метраў.
У афіцыйнай інтэрнэт-краме кампаніі адзін робат Chimera CX10 каштуе $329,99. Аднак беларускае мінабароны плануе выдаткаваць на закуп каля 460 тысяч рублёў, ці па $8951 за адзін беспілотнік.
«Разбежка ў цэнах можа быць звязана з закупкамі дадатковых камплектуючых (батарэй і інш.) або з карупцыяй пры правядзенні закупкаў», – мяркуе «Беларускі Гаюн».
На сайце вытворцы дронаў пазначана, што прадукцыя iFlight можа выкарыстоўвацца толькі ў грамадзянскіх мэтах і забароненая для выкарыстання падчас вайны.
,,«Малаверагодна, што гэтая забарона перашкодзіць МА РБ купіць беспілотнікі, бо іх закупка будзе праходзіць праз пасярэднікаў», – піша крыніца.
Нагадаем, дроны ўваходзяць у санкцыйны спіс ЕЗ – іх пастаўкі праз краіны ЕЗ у Беларусь забаронены. Акрамя таго, дроны фактычна знаходзяцца пад забаронай для выкарыстання фізічнымі асобамі ў Беларусі.
Тэса Анэйда / belsat.eu
