«У Амерыцы мы развязваем нашыя рознагалоссі каля выбарчай скрыні».
Прэзідэнт ЗША Джо Байдэн звярнуўся да амерыканцаў з просьбай знізіць палітычную тэмпературу і памятаць, што яны ўсе суседзі. Такую заяву ён зрабіў пасля таго, як адбыўся стрэл у ягонага імавернага спаборніка на выбарах Доналда Трампа, піша «Reuters».
Стрэлы ў Доналда Трампа на мітынгу ў Пенсільваніі «заклікаюць усіх нас зрабіць крок назад», сказаў Джо Байдэн. На шчасце, Трамп не атрымаў сур’ёзных раненняў, дадаў прэзідэнт.
,,«Мы не можам дапусціць, каб гэты гвалт зрабіўся нормаю. Палітычная рыторыка ў гэтай краіне вельмі напалілася. Прыйшоў час астудзіць яе. Мы ўсе абавязаныя гэта зрабіць, – сказаў Байдэн. – У Амерыцы мы развязваем нашыя рознагалоссі каля выбарчай скрыні. Вось як мы гэта робім. Каля выбарчай скрыні. Не куляй».
У сваім сяміхвілінным звароце Байдэн таксама ўспомніў пра шматлікія выпадкі палітычнага гвалту ў ЗША за апошнія гады, улучна з нападам прыхільнікаў Трампа на Капітолій 6 студзеня 2021 года і раненнем малатком Пола Пэлоўсі, мужа былой спікеркі Палаты прадстаўнікоў Нэнсі Пэлоўсі, у 2022 годзе.
«Гвалт ніколі не быў адказам», – сказаў Байдэн.
Доналд Трамп пасля замаху на сябе заклікаў амерыканцаў да адзінства:
«Мы не будзем баяцца, а замест гэтага застанемся ўстойлівымі ў сваёй веры і непакорлівымі перад тварам Зла. Мы выказваем нашую любоў іншым ахвярам і іхным семʼям. […] У гэты момант як ніколі важна, каб мы былі адзіныя і праявілі свой сапраўдны амерыканскі характар, застаючыся моцнымі і рашучымі і не дазваляючы Злу перамагчы».
Замах на Трампа адбыўся 13 ліпеня падчас перадвыбарчага мітынгу. Падчас выступу прэтэндэнт на месца прэзідэнта ЗША схапіўся за вуха і лёг на падлогу за трыбунай: куля пакінула драпіну, сурʼёзных траўмаў Трамп не атрымаў. Яго эвакуявалі супрацоўнікі Сакрэтнай службы.
У выніку страляніны адзін удзельнік мітынгу загінуў, двое атрымалі цяжкія раненні, паведамляе «The Associated Press».
Арсен Рудэнка belsat.eu
