Спойлер – не ўсе. Частка беларусаў, пацярпелых ад ураганаў, што абрынуліся на краіну апошнімі днямі, могуць звярнуцца па аднаразовую дапамогу ад дзяржавы. Абавязковая ўмова – месячны даход на аднаго чальца сям’і не большы за 628,10 рубля, распавяла прэс-служба Міністэрства працы. Каб атрымаць дапамогу, трэба звярнуцца ў тэрытарыяльны цэнтр сацыяльнага абслугоўвання насельніцтва адпаведна месцу жыхарства. Разлічваць на матэрыяльную дапамогу са сродкаў Фонду сацыяльнай абароны могуць таксама пацярпелыя ад непагадзі пенсіянеры, якія не працуюць, і людзі з інваліднасцю. Найперш цяпер дапамога вылучаецца тым, хто «праз аб’ектыўныя прычыны мае ў ёй вострую патрэбу: самотным сталым людзям і інвалідам». Сацыяльныя працаўнікі наведваюць гэтыя катэгорыі грамадзянаў, прывозяць ім прадукты, ваду, «супакойваюць і дапамагаюць з каардынацыяй з іншымі органамі для развязання пытанняў, што ўзніклі ў сувязі з непагаддзю». Паводле звестак Міністэрства працы, на сённяшні дзень сацыяльныя паслугі на даму атрымоўваюць больш за 100 тысячаў грамадзянаў, 24 тысячы з іх – самотныя. Некалькі рэгіёнаў Беларусі пацярпелі ад ураганных вятроў 13 – 14 ліпеня. Шасцёра чалавек загінулі. Шмат населеных пунктаў засталіся без электрычнасці і водазабеспячэння. Марыя Міхалевіч belsat.eu