Распачатае расследаванне.
Польскае выданне «Onet» апублікавала матэрыял пра датычнасць да фінансавых парушэнняў на «Белсаце» былой дырэктаркі тэлеканалу Агнешкі Рамашэўскай-Гузы і дзейнага дырэктара «Белсату» Аляксея Дзікавіцкага, які назваў публікацыю паклёпам і заявіў, што аўтар нават не спрабаваў атрымаць ягонага каментара.
18 ліпеня акруговая пракуратура Варшавы распачала расследаванне «паводле справы аб нанясенні Польскаму грамадскаму тэлебачанню TVP шкоды ў асабліва буйным памеры ў 2018–2024 гадах». Кампанія TVP, у склад якой уваходзіць «Белсат», магла страціць каля 7 мільёнаў злотых.
Паводле «Onet», топ-менеджараў «Белсату», у тым ліку былую дырэктарку каналу Агнешку Рамашэўскую-Гузы і дзейнага дырэктара Аляксея Дзікавіцкага, падазраюць у фінансавых парушэннях і перавышэнні службовых паўнамоцтваў. У артыкуле выдання згадваецца, што кіраўніцтва «Белсату» з 10 жніўня 2018 года да 10 студзеня 2024 года заключыла без тэндару 248 кантрактаў на IT-паслугі, частка якіх быццам бы ўвогуле не была выкананая.
Усё гэта, як сцвярджаецца «Onet», прывяло да таго, што Польскае тэлебачанне магло зазнаць страты на 7 мільёнаў злотых (прыблізна 1,77 мільёна долараў).
Паводле выдання, выканаўцам IT-паслуг выступала кампанія, што належыць Шыману Пуачу. Ён зняпраўджвае абвінавачанні на свой адрас: усе паслугі надаваліся згодна з рынкавым коштам.
Дырэктар «Белсату» Аляксей Дзікавіцкі апублікаваў на сваёй старонцы ў Facebook заяву з нагоды матэрыялу, што выйшаў на партале «Onet».
,,«Я, Аляксей Дзікавіцкі, в. а. дырэктара „Белсат TV”, з усёй адказнасцю заяўляю, што апісаныя ў артыкуле „Onet” „Onet ujawnia. Ponad 200 umów telewizji Biełsat ze spółką zarejestrowaną w prywatnym mieszkaniu” нібыта «злоўжыванні» ёсць няпраўдай і паклёпам. Аўтар артыкулу нават не зацікавіўся, як гэтага вымагаюць элементарныя журналісцкія правілы, ані маім каментаром, ані каментарамі іншых асобаў, чые прозвішчы пададзеныя ў матэрыяле.
Неўзабаве будзе падрыхтаваная адмысловая заява з падрабязным тлумачэннем сітуацыі, якая пойдзе ў рэдакцыю „Onet” і іншых медыяў. У выпадку адмовы ў яе публікацыі не выключаю юрыдычных крокаў. Праўда, раней ці пазней, але заўсёды пераможа», – напісаў Аляксей Дзікавіцкі.
Былая дырэктарка «Белсату» Агнешка Рамашэўская-Гузы паведаміла, што журналісты «Onet» спрабавалі звязацца з ёю праз працоўны тэлефонны нумар, які ў яе забралі 4 месяцы таму, і ніхто не спрабаваў звязацца з ёю праз сацыяльныя медыі.
Агнешка Рамашэўская-Гузы кіравала «Белсатам» амаль 18 гадоў – з часу яго стварэння. 12 сакавіка сталася вядома пра ейнае звальненне. Пасля таго Рамашэўская-Гузы падала пазоў супраць Польскага грамадскага тэлебачання, суд у гэтай справе яшчэ не пачынаўся.
belsat.eu
