Парадокс: калі забойца ўцячэ ў Сірыю, польскім спецслужбам будзе прасцей да яго дабрацца.
Як расказала польскае выданне «RMF24», спецслужбы Польшчы выявілі, хто забіў салдата на мяжы з Беларуссю. Падазраваны застаецца на тэрыторыі Беларусі, але можа эвакуявацца ў Сірыю.
21-гадовы сяржант Матэўш Сітэк памёр 6 чэрвеня ў выніку нападу мігранта з нажом, прыматаным да дубца, на беларуска-польскай мяжы 28 траўня.
Афіцыйна пра выяўленне падазраванага Польшча не казала, журналісты даведаліся пра гэта праз неафіцыйныя каналы. Імя і знешнасць меркаванага забойцы жаўнера не раскрываюць. Раней паведамлялася, што праваахоўныя органы Польшчы маюць запісы, на якіх відаць мужчыну.
Цяпер сцвярджаецца, што падазраванага ідэнтыфікавалі з запісаў, а таксама дзякуючы допытам мігрантаў, якія ўжо трапілі на тэрыторыю Польшчы, і інфарматараў з ліку мігрантаў на тэрыторыі Беларусі. Нападнік, як мяркуецца, паходзіць з Блізкага Усходу, цяпер застаецца ў Беларусі. Ён можа ў любы момант уцячы ў Сірыю ці іншую краіну Блізкага Усходу, але «RMF24» заўважае парадокс: тады польскім спецслужбам будзе нават прасцей дабрацца да яго.
Беларускія ўлады не дапамагаюць шукаць забойцу, хоць Польшча афіцыйна звярталася за дапамогай у расследаванні, адзначае «RMF24». На думку журналістаў выдання, забойства адбылося са згоды Аляксандра Лукашэнкі, які штучна стварыў і не спыняе міграцыйны крызіс. Хоць яго інтэнсіўнасць на польскім кірунку апошнім часам знізілася.
Алесь Наваборскі belsat.eu
