Падтрымлівае Украіну, крытыкуе Пуціна і сустракалася са Святланай Ціханоўскай.
Увечары 21 ліпеня Джо Байдэн заявіў, што добраахвотна выходзіць з гонкі паводле просьбаў калегаў з партыі і падтрымаў вылучэнне віцэ-прэзідэнткі Камалы Гэрыс у якасці кандыдаткі на пасаду прэзідэнта ЗША ад дэмакратаў. Праз некалькі гадзінаў пасля заявы Байдэна Гэрыс падала заяўку ў Федэральную выбарчую камісію ЗША, а перадвыбарчы штаб Байдэна быў перайменаваны ў «Гэрыс у прэзідэнты». Разбіраемся, хто такая Камала Гэрыс.
Камала Гэрыс нарадзілася 20 кастрычніка 1965-га ў горадзе Окленд штата Каліфорнія. У ёй цячэ індыйская і ямайская крыві. Маці Шамала Гопалан – ураджэнка Індыі, бацька Дональд Гэрыс – з Ямайкі. Скончыла два ўніверсітэты: у Говардскім абараніла дыплом у галіне паліталогіі і эканомікі, а ў каледжы Гасцінгса – ступень доктара права.
Ужо ў 1990 годзе Камала Гэрыс заняла пасаду намесніка пракурора ў акрузе Аламіда ў штаце Каліфорнія. Адным з яе першых карʼерных дасягненняў стала зніжэнне статыстыкі падлеткавай прастытуцыі. Гэрыс дамаглася, каб дзяўчат, занятых у прастытуцыі, разглядалі не толькі ў якасці злачынцаў, але і ахвяр сутэнёраў і разбэшчвання.
Праз некалькі гадоў Гэрыс стала членам Апеляцыйнага савету па страхаванні ад беспрацоўя і ў хуткім часе заняла пасаду акруговага пракурора Сан-Францыска. Некаторыя лічаць, што Камала нарабіла шмат памылак. У прыватнасці яна адмовілася патрабаваць смяротнае пакаранне для абвінавачанага ў забойстве паліцэйскага.
Генеральны пракурор Каліфорніі і сенатары абвінавацілі яе ў перавышэнні службовых паўнамоцтваў. Але гэта не перашкодзіла ёй у 2017-м стаць сенатарам ад гэтага ж штата. Тады пра яе пачалі казаць:
,,«Гэтая жанчына такімі тэмпамі дабярэцца да Белага дому».
І сапраўды ў канцы 2019 года Гэрыс абвясціла пра намер балатавацца ў кандыдаткі ў прэзідэнты ад Дэмакратычнай партыі. Удзельнічала ў дэбатах з Джонам Байдэнам і нават вырывалася наперад, але пасля невыразнага выступу на летніх дэбатах і несуцяшальных вынікаў восеньскіх апытанняў, абвясціла, што выходзіць з гонкі. Амерыканскія СМІ ўпэўненыя, што тады праблемы ў Харыс паўсталі праз адсутнасць выразнай перадвыбарнай кампаніі.
У сакавіку 2020 года Харыс публічна падтрымала Джо Байдэна, а ў жніўні ён абвясціў, што менавіта Камала будзе яго правай рукой.
Камала Гэрыс стала першай у гісторыі ЗША жанчынай, абранай на пасаду віцэ-прэзідэнта. Яна таксама і першая цемнаскурая, якая атрымала магчымасць стаць «дублёрам» кіраўніка Белага дому.
У Злучаных Штатах віцэ-прэзідэнт – гэта той, хто ў выпадку смерці або недзеяздольнасці прэзідэнта займае яго месца. Пасля ўступлення на пасаду Гэрыс даручылі працаваць над праблемамі міграцыі з Цэнтральнай Амерыкі, пасля гэтага рэспубліканцы неаднаразова абвінавачвалі яе ў праблемах з нелегальным перасячэннем мяжы. Пры гэтым Камала атрымала вялікую вядомасць як самая яркая у Белым доме абаронца правоў жанчын на аборт . Таксама яна мела ключавую ролю ў працы з моладдзю і выбаршчыкамі з ліку меншасцяў.
У мінулым Камала Гэрыс неаднаразова крытыкавала Джо Байдэна ў тым ліку за пазіцыю ў дачыненні да афраамерыканцаў. Не выключана, што Байдэну Камала тады спатрэбілася ў тым ліку, каб «пазбавіцца ад цёмных плямаў». Ён таксама разлічваў, што Гэрыс прынясе яму галасы афраамерыканцаў і жанчын. Мяркуючы па ўсім, гэты разлік апраўдаўся.
Пра асабістае жыццё Гэрыс і яе інтарэсы вядома, што з 2014 года яна ў шлюбе з юрыстам Дугласам Эмхафам. У 2024 годзе часопіс Forbes ацаніў іх багацце ў $8 млн. Вядома, што Гэрыс – прыхаджанка баптысцкай царквы. Падчас публічных выступленняў яна называе сябе «ганарлівай амерыканкай», часта распавядае пра свой багаты культурны бэкграўнд, вельмі кранальна ставіцца да афраамерыканскай культуры і абараняе правы цемнаскурых.
Па дадзеных The New York Times, Камала любіць гатаваць, збірае рэцэпты ў адмысловую папачку, пры гэтым яе «фірмовая страва» – запечаная ў духоўцы курыца.
Яшчэ адна асаблівасць Гэрыс – любоў да кедаў Converse, якіх у яе велізарная колькасць. На перадвыбарных мітынгах Камала, дарэчы, таксама выступала ў Converse. На ралі ў Фларыдзе ў 2020 годзе яна зʼявілася ў белых кедах з надпісам і значкамі Stop Hate, I Love Kamala, Save Earth і Vote. У вопратцы Гэрыс аддае перавагу строгім касцюмам. Любімыя колеры – чорны і блакітны.
У красавіку 2022 года Камала Гэрыс была ўнесеная ў расейскі санкцыйны спіс на бестэрміновай аснове.
Пасля пачатку вайны ва Украіне Гэрыс неаднаразова выказвалася ў падтрымку Кіева. З апошняга – у чэрвені 2024 году падчас канферэнцыі ў Швейцарыі. Тады яна падкрэсліла, што гэта не дабрачыннасць, бо народ Украіны і яго будучыня знаходзяцца ў сферы стратэгічных інтарэсаў ЗША.
Сваё стаўленне да Уладзіміра Пуціна Харыс таксама выказвала:
,,«Час не на баку Пуціна, – так Харыс заявіла падчас свайго ўдзелу ў Мюнхенскай канферэнцыі па бяспецы ў лютым 2023 года. – Калі Пуцін думае, што зможа ўзяць верх, чакаючы сітуацыю, ён моцна памыляецца».
У той жа канферэнцыі ўдзельнічала і Святлана Ціханоўская.
Таксама Камала заяўляла, што ЗША будуць дапамагаць Украіне столькі, колькі гэта спатрэбіцца.
Джо Байдэн падтрымаў кандыдатуру Камалы Гэрыс.
,,«Я хачу цалкам падтрымаць і ўхваліць кандыдатуру Камалы на пасаду кандыдата ад нашай партыі сёлета», – напісаў Байдэна на сваёй старонцы ў сацсетках з нагоды перадачы свайго месца Харыс у прэзідэнцкай гонцы.
Гэрыс у сваю чаргу ахарактарызавала рашэнне Байдэна адысці ў бок як «самаадданы і патрыятычны акт», заявіўшы, што ён ставіць амерыканскі народ і краіну вышэй асабістых амбіцый.
Калі Гэрыс удасца абысці Дональда Трампа на выбарах у лістападзе, то яна стане першай жанчынай-прэзідэнткай ЗША, у дадатак да ўсяго яшчэ і першай чарнаскурай жанчынай-прэзідэнткай, і гэта ўсюды падкрэсліваецца. Тым не менш, яе намінацыя не зʼяўляецца чымсьці выніковым, і ёсць прапановы аб правядзенні хуткіх «міні-праймерыз» для разгляду іншых кандыдатаў перад зʼездам партыі ў Чыкага ў наступным месяцы.
Надзея Вольная belsat.eu
