Ужо сёння вызваленне Пачобута ёсць умовай польскага боку для «больш шырокага адкрыцця памежных пераходаў».
Анджэй Пачобут заставаўся козырам у рукаве лукашэнкаўскага рэжыму ў адносінах з Польшчай некалькі гадоў. Прыйшоў час, калі, ведучы перамовы наконт вызвалення палітвязня, Польшча паставіла свае ўмовы. Ужо сёння вызваленне Пачобута ёсць умоваю польскага боку для «больш шырокага адкрыцця памежных пераходаў». Іншыя патрабаванні – спыненне «адпраўлення мігрантаў з беларускага боку на мяжу з Польшчай» і супраца з польскімі службамі «ў пытанні забойцы сяржанта Матэўша Сітэка, які быў смяротна паранены пры абароне памежнага бар’еру».
Вядомага гарадзенскага журналіста, актывіста польскай меншасці Анджэя Пачобута затрымалі 25 сакавіка 2021 года ў Горадні, асудзілі на 8 гадоў зняволення за журналісцкія матэрыялы і этапавалі ў самую жорсткую калонію Беларусі. З сёлетняга 26 лютага пра яго няма ніякіх вестак. Усе гэтыя тры гады ён зазнае ціск і катаванні, яму не перадаюць неабходных лекаў, нягледзячы на праблемы з сэрцам. І ўвесь гэты час вызваліць журналіста спрабавала польская дыпламатыя, аднак пакуль безвынікова.
23 ліпеня стала вядома, што Варшава распачала новы этап перамоваў з Менскам наконт вызвалення палітвязня Пачобута. Пра гэта паведамляе польскае «Radio ZET» са спасылкаю на неназванага чыноўніка Міністэрства замежных справаў.
Адзначаецца, што перамовы вядуць «чыноўнікі найніжэйшага звяна МЗС і консульскіх службаў Польшчы».
Паводле інфармацыі медыяў, адным з аргументаў, які Варшава можа выкарыстаць пры кантактах з Менскам, «ёсць пытанне поўнага закрыцця памежных пераходаў».
,,«Калі нічога не зменіцца, мы цалкам закрыем памежныя пераходы з Беларуссю. І гэта таксама ўдарыць па таварах, што імпартуюцца з Кітаю», – паведаміла крыніца медыя.
Заяўлена, што ўмовамі для больш шырокага адкрыцця памежных пераходаў ёсць вызваленне Пачобута, спыненне «адпраўлення мігрантаў з беларускага боку на мяжу з Польшчай», а таксама супраца з польскімі службамі «ў пытанні забойцы сяржанта Матэўша Сітэка, які быў смяротна паранены пры абароне памежнага бар’еру».
Варта адзначыць, што гэтыя ж пункты намеснік міністра замежных справаў Польшчы Анджэй Шэйна назваў напярэдадні ў інтэрв’ю «Radio ZET» як «канкрэтныя ўмовы», якія Беларусь мусіць выканаць, калі яна «хоча нармалізаваць стасункі».
Надзея Вольная belsat.eu
