І адзначыў, што гэта адбылося дзякуючы ўказу, які дазваляе канфіскацыю транспартных сродкаў.
У Мінтрансе заявілі, што дзейнасць нелегальных маршрутчыкаў, якія займаліся перавозкамі пасажыраў без дазволаў, практычна спыненая. Гэтага ўдалося дасягнуць дзякуючы ўказу Лукашэнкі, які дазваляе канфіскацыю транспартных сродкаў да рашэння суда.
Такую заяву зрабіў начальнік упраўлення аўтамабільнага і гарадскога пасажырскага транспарту Мінтранса Андрэй Гладкі, маючы на ўвазе ўказ Лукашэнкі №32 «Пра аўтамабільныя перавозкі пасажыраў».
Паводле Андрэя Гладкага, за бягучы год было канфіскавана каля 280 адзінак легкавога транспарту і каля 70 аўтобусаў, якія выконвалі незаконныя перавозкі таксі.
,,«Фактычна на сённяшні момант ужо спынена дзейнасць нерэгулярных перавозчыкаў, якія выконвалі аўтобусамі катэгорыі два, так званымі маршруткамі», – адзначыў прадстаўнік Мінтранса.
Нагадаем, што ўлады вырашылі ўвесці больш жорсткі кантроль за перавозчыкамі пасля некалькіх сур’ёзных дарожна-транспартных здарэнняў з удзелам маршрутак.
Так, паводле ДАІ, са студзеня да пачатку чэрвеня 2024 года з удзелам маршрутак адбылося 32 ДТЗ. 60 чалавек атрымалі траўмы рознай ступені цяжкасці.
Раман Шавель belsat.eu
