Падчас падзеяў 2020 года гэты будынак стаўся месцам катаванняў удзельнікаў мірных пратэстаў.
Увечары 26 ліпеня ў Гомлі часткова абрынуўся фасад адміністрацыйнага будынку на вуліцы Сялянскай, дзе да 2022 года месціўся РАУС Цэнтральнага раёну.
У Міністэрстве па надзвычайных сітуацыях паведамілі, што адміністрацыйны будынак не эксплуатаваўся, пацярпелых у выніку інцыдэнту няма. Прычыны здарэння высвятляюцца.
Цяпер ратавальнікі разбіраюць завалы, да працаў прыцягнутыя 57 чалавек і 26 адзінак тэхнікі. З нагоды здарэння было скліканае выязное пасяджэнне камісіі па надзвычайных сітуацыях пры Гомельскім гарадскім выканаўчым камітэце.
Выданне «Флагшток» паведамляе, што ў будынку на вул. Сялянскай да 2022 года месціўся РАУС Цэнтральнага раёну. Падчас падзеяў 2020 года ён стаўся месцам катаванняў удзельнікаў мірных пратэстаў. Шмат хто выходзіў адтуль з сурʼёзнымі траўмамі.
У сакавіку 2022 года Цэнтральнае РАУС пераехала ў новы будынак на вуліцы Галавацкага. Увосень 2023 года комплекс на вуліцы Сялянскай быў выстаўлены на аўкцыён амаль за мільён рублёў. Пакупніку прапаноўвалася выкарыстоўваць будынак для размяшчэння абʼектаў грамадзянскай абароны.
Глеб Нержын belsat.eu
