Гэта ўжо пятая кампанія ў Беларусі.
У Беларусі, вельмі верагодна, з’явіўся новы вытворца тытунёвых вырабаў. Гэта вынікае з дадзеных пра рознічныя цэны на тытунёвыя вырабы з 1 жніўня 2024 года, апублікаваных Міністэрствам па падатках і зборах, піша тэлеграм-канал «Мотолько Помоги».
Назва новага вытворцы фігуруе ў раздзеле «Цыгарэты з фільтрам, якія вырабляюцца на тэрыторыі Рэспублікі Беларусь». Гаворка пра ЗТАА «Алідзі-Вест». Гэта ўжо пятая кампанія, якая згадваецца ў справаздачы, раней у ёй фігуравалі ГТФ «Нёман», ТАА «Тытунь-інвест», ТАА «Інтэр Табака» і ТАА «Сентоні ПРО», створаная Паўлам Тапузідзісам.
Кампанія «Алідзі-Вест» задэкларавала цэны на два гатункі цыгарэт такіх марак, як «Kent Crystal Red» і «Kent Crystal Exotic».
Гэтая кампанія была зарэгістраваная ў Беларусі яшчэ ў 2011 годзе, яна з’яўляецца філіялам расейскай фірмы «Алідзі», якая займаецца аптовым гандлем нехарчовымі таварамі.
У той жа час, адметна, што ў сакавіку 2024 года «Алідзі-Вест» атрымала ліцэнзію на вытворчасць алкагольнай, нехарчовай спіртаўтрымальнай прадукцыі, нехарчовага этылавага спірту і тытунёвых вырабаў. У 2017-м яна таксама атрымала ліцэнзію на аптовы гандаль і захоўванне алкагольнай і тытунёвай прадукцыі.
Нагадаем, што асноўныя беларускія тытунёвыя фабрыкі ГТФ «Нёман», ТАА «Тытунь-інвест», ТАА «Інтэр Табака» знаходзяцца пад санкцыямі.
Рэгуляваннем тытунёвага рынку ў Беларусі займаецца Белдзяржхарчпрам, які выдае квоты тытунёвым фабрыкам. Прычым квотаў выдзялялася заўсёды нашмат больш, чым неабходна беларускаму рынку. Вядома таксама, што беларускія тытунёвыя вырабы паступаюць на Захад, у Расею ў выглядзе кантрабанды, што прыносіць вялікія прыбыткі рэжыму Аляксандра Лукашэнкі.
Раман Шавель belsat.eu
