Пра гэта апавялі сваякі зняволеных, якія ўтрымліваюцца ў калоніі № 15 каля Магілёва.
Палітычным вязням, тэрміны якіх блізкія да завяршэння, прапанавалі пісаць прашэнні аб памілаванні на імя Аляксандра Лукашэнкі, паведамляе радыё «Свабода» са спасылкаю на сваякоў асуджаных, якія адбываюць пакаранне ў калоніі № 15 каля Магілёва.
Крыніца таксама апавяла, што ў пачатку ліпеня з калоніі паводле амністыі выйшлі некалькі палітвязняў з сур’ёзнымі праблемамі са здароўем. Цяпер жа выклікаюць вязняў, у якіх неўзабаве канчаюцца тэрміны:
,,«Месяц, а то і пара тыдняў – і на свабоду. І прапанавалі ім пісаць прашэнні аб памілаванні. Сказалі, што Лукашэнка можа падпісаць, хай чакаюць. Некаторыя цяпер думаюць, ці варта пагаджацца, бо і без таго спадзяюцца выйсці неўзабаве на волю».
Колькасці тых, каму прапанавалі пісаць прашэнні аб памілаванні, суразмоўца радыё «Свабода» не ведае:
,,«Гэта некалькі чалавек, не адзінкі. Але сярод іх дакладна няма тых, каму выходзіць на волю яшчэ няхутка».
Паводле праваабаронцаў, у пачатку ліпеня на волю паводле амністыі і праз памілаванне выйшлі каля 20 палітвязняў.
Публічна адразу агучылі толькі імя лідара Партыі БНФ Рыгора Кастусёва, хворага на рак і асуджанага да 10 гадоў калоніі.
Пазней стала вядома, што на волю праз памілаванне з Гомельскай жаночай калоніі выйшлі палітзняволеныя Дар’я Лосік, Святлана Лупач, Паліна Палавінка, Тамара Астрэйка і Кацярына Мадзянкова.
Марыя Міхалевіч belsat.eu
