Спіс Магніцкага патэнцыйна зможа закрануць несумленнага чыноўніка, палітыка, ці бізнесоўца з любой краіны свету. Прапанову сенат прыняў разам з цэлым пакетам абарончай стратэгіі ЗША – дакументам, што вызначыць стратэгію краіны ў гэтым напрамку на бліжэйшыя гады. Ці падпіша Барак Оўбама такі істотны законапраект у апошнія тыдні свайго прэзідэнцтва, і будзе дакумент тычацца нашае краіны?
«Можна чакаць, што нейкія прапановы адносна ўнясення кагосьці з Беларусі будуць зробленыя. Пабачым, як будзе дзеяць адміністрацыя Трампа, але ў кожным выпадку, выглядае на тое, што прэзідэнт Оўбама будзе вымушаны падпісаць гэты законапраект і ён уступіць у моц яшчэ да таго, як Доналд Трамп стане прэзідэнтам ЗША», – лічыць Алесь Лагвінец.
Сяргей Магніцкі загінуў у маскоўскім СІЗА нумар адзін у лістападзе сем год таму. Адвакат распачаў следства па факце крадзяжу амаль пяці з паловаю мільярдаў рублёў з бюджэту Расеі, да якога апынуліся датычнымі дзясяткі чыноўнікаў расейскай вертыкалі. Аднак у выніку самога Магніцкага арыштавалі па абвінавачанні ў дапамозе ўва ўхіленні ад аплаты падаткаў. Прычым адпаведны загад далі ўласна фігуранты расследавання Магніцкага.
Праваабаронцы сцвярджаюць, што юрыст быў закатаваны ў СІЗА, і што адміністрацыя ізалятара намагалася выкрасліць з акту аб смерці інфармацыю пра закрытую чэрапна-мазгавую траўму, якая сталася непасрэднай прычынай смерці.
Прозвішча Магніцкага ў пэўным сэнсе стала сімвалам. Да закону Магніцкага ўжо далучылася Эстонія і ў ЗША спадзяюцца, што яе прыкладам пойдзе ўвесь дэмакратычны свет
«Верагоднасць такая ёсць, але я б не сказаў, што гэты акт радыкальным чынам памяняе ўсю сістэму міжнародных адносінаў. Але гэта маральны жэст з боку самай магутнай дэмакратыі свету», – кажа Лагвінец.
Крэмль не хаваў абурэння пасля прыняцца закону Магніцкага і ((графіка)) прыняў у адказ адразу два дакументы. Першы абмяжоўваў уезд у Расею амерыканскім службоўцам, нібыта датычным да катаванняў у турме Гуантанама. Другі забараніў усынаўляць расейскіх дзяцей амерыканскім грамадзянам. Пуцін тлумачыў, што тое былі вымушаныя крокі, маўляў, не Расея першая пачала. «Мы хіба прынялі гэты спіс Магніцкага? – пытаў Пуцін. – Ну з якога ражна гэта было зроблена – патлумачце! Ніхто ж не можа патлумачыць і сказаць – навошта».
Самога Магніцкага, праз тры гады пасля смерці, прызналі вінаватым ува ўхіленні ад падаткаў. Гэта быў першы такі вырак у гісторыі расейскай Феміды. Адміністрацыю ж СІЗА суд палічыў невінаватай у смерці адваката
Усевалад Шлыкаў
