Гарачы каментар Вадзім Іосуб пра дэкрэт аб дэпазітах: Найбольш пацярпяць укладальнікі


Зняў грошы з рублёвага дэпазіту раней, чым праз год, – заплаці падаходны падатак. Зняў з валютнага дэпазіту раней, чым праз два гады, – таксама заплаці. У скароце так выглядае сутнасць дэкрэту № 7 «Аб прыцягненні грашовых сродкаў у дэпазіты», які напярэдадні падпісаў Аляксандр Лукашэнка.Дакумент мае на мэце рэгуляванне банкаўскага дэпазітнага рынку краіны. Згодна з дэкрэтам № 7, у заканадаўства ўводзяцца паняткі «безадзыўнога» і «адзыўнога ўнёску». Першы нельга зняць датэрмінова, але яго прывабнасць у тым, што грошы размяшчаюцца пад большы адсотак.Другі момант датычыць падаткаабкладання тых адсоткаў, якія банк налічвае паводле дэпазітаў. Падаходны падатак памерам 13 % трэба будзе заплаціць у выпадку рублёвага ўнёску тэрмінам да года, і валютнага – да двух гадоў. Новаўвядзенні не закрануць дамоваў, заключаных да сённяшняга дня.Госць «Гарачага каментара» – фінансавы аналітык Вадзім Іосуб, які мяркуе, што больш за ўсё ад гэтага дэкрэту пацярпяць укладальнікі.

«Выгада тут неадназначная як для банкаўскай сістэмы, так і для дзяржавы. Асноўны матыў, пасыл тут зразумелы – гэта жаданне, каб укладальнікі перамясціліся з кароткіх укладаў у больш доўгія, каб зберагалі грошы на больш доўгія тэрміны. У гэтым выпадку банкам прасцей крэдытаваць эканоміку. Аднак мне падаецца не да канца пралічанай рэакцыя ўкладальнікаў на гэтыя стымулы. Эфект можа быць не той, якога чакалі, – не пераход з кароткіх дэпазітаў у доўгія, а проста выхад з дэпазітаў і пакупка на гэтыя грошы валюты. У гэтым выпадку ні дзяржава, ні банкаўская сістэма не атрымаюць чаканых бонусаў», – падкрэсліў адмысловец.

Больш – у відэаматэрыяле.МЯ, belsat.eu

Каментары