Гарачы каментар Украінскі дэпутат: «11 гадоў таму я сядзеў на Акрэсціна»


Пра міжнародныя стасункі Украіны і Беларусі ўзгадваюць часцяком толькі напярэдадні чарнобыльскай гадавіны. Аднак пытанняў для абмеркавання назапасілася шмат: адсутнасць амбасадара Украіны больш за год, лёсы беларускіх добраахвотнікаў ва Украіне ды супольная ядравая трагедыя. Між тым выглядае на тое, што афіцыйны Менск да дыялогу не зусім гатовы.Беларускі нейтралітэт ва ўкраінскім пытанні ўсё больш выклікае сумневы. Гэтак, у Менску разглядаюцца адразу дзве справы беларусаў, звязаныя з удзелам у канфлікце ва Украіне. На мінулым тыдні Аляксандр Лукашэнка падпісаў указ, які прадугледжвае крымінальную адказнасць за ўдзел у вайсковых канфліктах за мяжою. Тыдзень таму на беларускай мяжы здымачная група ўкраінскага тэлеканалу «1+1» прайшла праз жорсткі дагляд. Матэрыялы ўкраінскіх журналістаў у асноўным былі крытычныя ў адносінах да ўладаў Беларусі, у кантэксце ўкраінска-расейскага канфлікту. А сёння на тэрыторыю нашай краіны не пусцілі ўкраінскага дэпутата Ігара Гузя, які актыўна займаўся пытаннем беларускіх добраахвотнікаў ды мусіў узяць удзел у «Чарнобыльскім шляху».

«Я буду размаўляць з кіраўніком МЗС Украіны адносна гэтай сітуацыі. Я лічу, што мусіць паўстаць нота пратэсту ў звязку з гэтай сітуацыяй. 11 гадоў таму, калі я яшчэ не быў дэпутатам і браў удзел у «Чарнобыльскім шляху» разам з «Маладым фронтам», то трапіў на Акрэсціна. Я нічога не парушаў, але быў вымушаны адсядзець, а пасля быў дэпартаваны на 5 гадоў. З таго часу я не памяняў свае перакананні», – заявіў украінскі палітык у эфіры праграмы «Гарачы каментар».

Глядзіце таксама >>> «Чарнобыльскі шлях–2016». Жывая трансляцыя на belsat.euНагадаем, што нядаўна Ігар Гузь публічна падтрымаў беларускіх байцоў, якія абаранялі Украіну падчас вайны з Расеяй. Цяпер некаторыя з іх пераследуюцца на радзіме, у памяшканнях іх родных праводзяцца ператрусы, а ва Украіне стаіць пытанне пра экстрадыцыю добраахвотнікаў у Беларусь. Менавіта таму Ігар Гузь у сценах Вярхоўнай Рады выступіў з ініцыятывай увесці мараторый на выдачу беларускіх байцоў уладам Беларусі.Нягледзячы на забарону на ўезд, народны дэпутат працягне прасоўваць у Вярхоўнай Радзе ініцыятыву мараторыю на экстрадыцыю добраахвотнікаў.Больш у відэаматэрыяле!

Каментары