Свет Катастрофа расейскага аэробуса: цьмяная трагедыя


Выбух на борце, тэхнічная праблема ці нават здрада егіпецкіх спецслужбаў. Версіі прычыны трагедыі расейскага лайнера А321 толькі множацца на фоне зняпраўджвання Крамлём імавернасці тэракту. Тым часам без расейскіх рэйсаў мясцовыя курорты пусцеюць.У кампаніі «Airbus», чые адмыслоўцы высвятляюць прычыны трагедыі, заяўляюць, што ніякіх тэхнічных праблемаў на борце лайнера пакуль не знайшлі. Тым часам ананімная крыніца расейскага выдання «Коммерсантъ», заяўляе, што нягледзячы на афіцыйныя заявы ў Крамлі разглядаюць версію тэракту. Між іншага, тэрарыстам маглі дапамагчы егіпецкія спецслужбы, бо ў любым выпадку – на іх ляжыць адказнасць за смерць 224 пасажыраў лайнера, мяркуе суразмоўца выдання. Пра імавернасць выбуху на борце неаднаразова заяўлялі і заходнія афіцыйныя асобы.Філіп Гэманд, міністр замежных справаў Вялікай Брытаніі мяркуе, што канчатковы адказ – была гэта бомба ці не – з’явіцца толькі пасля канчатковага аналізу рэштак летака:

«Відавочна, што мы гэтага не кантралюем. Толькі Расея і Егіпет могуць даць адказ на гэтае пытанне. Нашыя высновы выводзяцца толькі з той інфармацыі, якая ў нас ёсць».

І Масква, і Каір дагэтуль, прынамсі афіцыйна, працягваюць настойваць на тым, што прычынаю трагедыі была тэхнічная непаладка лайнера. Пры гэтым, паводле крыніцаў агенцтва «Reuters», улады гэтых краінаў нават не адказалі на прапанову дапамогі ад Федэральнага бюро расследаванняў ЗША. Тым ужо цяпер у небе Шарм-эш-Шэйху, адкуль вылецеў расейскі лайнер, няма летакоў большасці авіякампаніяў свету. Для горада-курорту – гэта катастрофа.Адзін з мясцовых жыхароў, які трымае пляжную каварню, у роспачы:

«Гэты расейскі лятак ударыў і па нас. Яны яшчэ не абвесцілі вынікі расследавання, а мы ўжо адчулі наступствы. Гэткія трагедыі адбываюцца і ў іншых месцах – чаму туды не перастаюць лятаць самалёты?»

Пасля забароны рэйсаў у Егіпет расейскі ўрад абмяркуе магчымасці адмены авіязлучэння і з іншымі краінамі свету ў выпадку з’яўлення гэткай сітуацыі. На момант адмены палётаў на егіпецкіх курортах было каля васьмідзесяці тысяч расейцаў. Дваццаць пяць тысяч ужо вярнуліся дадому летакамі Міністэрства надзвычайных сітуацыяў Расеі.Усевалад Шлыкаў, «Белсат»

Каментары