У Жлобіне дзее грамадскае аб’яднанне Рух маці 328, якое аб’ядноўвае сваякоў людзей, асуджаных за наркотыкі. Сябры аб’яднання дамагаюцца зменаў у заканадаўстве адносна наркотыкаў: змяншэння тэрмінаў зняволення, забароны на выкарыстанне міліцыяй правакацыяў, а таксама выступаюць за амністыі.
Актывісты збіраюць подпісы і накіроўваюць калектыўныя звароты ў пракуратуру, Следчы камітэт і Міністэрства ўнутраных справаў. Яны ладзяць інфармацыйныя акцыі, круглыя сталы, дый проста падтрымліваюць адзін аднаго.
13 гадоў спаўняецца анімацыйнаму тэатру Лідскага замку. «Чортаў» юбілей рэжысёр і актор Андрэй Арыніч разам з сябрамі збіраюцца сустрэць новай беларускамоўнай інсцэнізацыяй «Суд над Кейстутам».
Дагэтуль спадар Андрэй 10 гадоў працаваў паўнамоцным прадстаўніком у Беларусі міжнароднага дзіцячага дабрачыннага фонду «Тэадора», які заснаваў у Швейцарыі грамадскі дзеяч Андрэ Пулі. Пад уплывам знакамітага швейцарца Андрэй стаў таксама клоўнатэрапеўтам. Гэта калі да вельмі хворых дзетак у госпісах і анкадыспансерах прыходзіць забаўны чалавек у апранахах блазна і прымушае хоць на гадзінку забыцца пра жахлівы боль ад невылечных хваробаў. Далейшы расповед – пра трагічную гісторыю шчаслівага чалавека глядзіце зараз.
Юрый Каліна – падляскі беларус і журналіст «Белсату», ужо не адзін раз дакументаваў жыццё нашых суайчыннікаў па абодва бакі мяжы. Гэтым разам тэмаю ягонага фільму выступае бежанства.
На меркаванне гісторыкаў, ад паўтара да двух мільёнаў беларусаў – жыхароў заходніх губерняў Расейскай імперыі – збеглі ад Першай сусветнай вайны ў глыб Расеі. Праз стагоддзе пасля гэтай падзеі паўстала незвычайная стужка. Яе першая публічная прэзентацыя адбылася ў Беластоку.