Гарачы каментар Паповіч: Рэферэндум у Нідэрландах – не прысуд для Украіны


https://www.youtube.com/watch?v=J6u64Ww6bPgЕўраскептыкі перамаглі. Амаль дзве траціны ўдзельнікаў рэферэндуму ў Нідэрландах сказалі «не» асацыяцыі Еўразвязу з Украінаю. І нягледзячы на тое, што плебісцыт меў не абавязковы, а рэкамендацыйны характар, галоўныя палітыкі краіны цюльпанаў заяўляюць пра верагоднасць накладання вета на развіццё хаўрусу паміж абʼяднанай Еўропаю і Украінаю.Прэзідэнт Пятро Парашэнка назваў вынікі галасавання ў Нідэрландах «атакаю на адзінства Еўропы» і абяцаў не сыходзіць са шляху еўрапеізацыі краіны ні на крок. Некаторыя адмыслоўцы заяўляць, што галасаванне было хутчэй не супраць Украіны, а супраць Бруселю і палітыкі еўрачыноўнікаў. Разам з тым імідж Украіны як вельмі карумпаванай дзяржавы, ды яшчэ і з замарожанай вайною на ўсходніх межах, згуляў на руку праціўнікам асацыяцыі Еўразвязу і Украіны. У «Гарачым каментары» – грамадская актывістка Дарʼя Слабчанка і палітычны аглядальнік Вольга Паповіч.

«Шчыра скажу, было б сюрпрызам, калі б вынікі рэферэндуму ў Нідэрландах былі іншыя. Паколькі было вядома, што не было вялікай зацікаўленасці сярод насельніцтва гэтай краіны падчас гэтага галасавання. Тым не менш сацыялагічныя апытанні паказвалі, што галандцы, якія збіраліся галасаваць, выступаюць супраць асацыяцыі з Украінай. Тут было такое пытанне, ці адбудзецца ўвогуле гэты рэферэндум у плане яўкі. На жаль, для Украіны, яўкі хапіла. Але вынік гэтага рэферэндуму не прысуд для Украіны і не трагедыя. Мне падаецца, тут трэба самому ЕЗ дастаткова ўвагі надаваць той палітыцы, якую ён праводзяць», – заявіла Вольга Паповіч.

Сваім меркаваннем наконт вынікаў рэферэндуму падзялілася і грамадская актывістка Дарʼя Слабчанка, якая назірала за працэсам галасавання:

«Як і шмат якія галандцы я пачала цікавіцца рэферэндумам бліжэй да самой даты. Неяк у апошні тыдзень усе ўцягнуліся ў працэс. Для шмат якіх галандцаў рэферэндум быў не пра Украіну. Украіна тут была, хутчэй, ахвярай абставінаў. Я проста зайшла на ўчастак і сказала, што я з Беларусі, папрасіла там застацца паназіраць. Мяне вельмі прыязна сустрэлі, атмасфера была непараўнальная з нашай (у Беларусі). Людзі заходзілі, жартавалі. Пасля працэдура была даволі празрыстая, хаця ў мяне не было ніякай акрэдытацыі, ніякага дакументу. Мне паказалі ўсё як назіральніку. Шмат хто з галандцаў засмучаны вынікамі, бо гэты рэферэндум будзе мець вялікія наступствы для самой краіны».

Каментары