Словы і музыка спляліся ў адно – на вечары меладэкламацыі ў музеі Азгура. Імправізавалі ды ўводзілі слухачоў у транс «Віктар Сямашка ды Кумпанія».
Менскі музыка-авангардыст Віктар Сямашка даўно займаецца меладэкламацыяй. Такое выкананне дазваляе сысці ад формы песні, пры гэтым музыка і вершы раскрываюцца паасобку і ўзбагачаюць адно адное. Тэксты Віктар піша сам, а музыка – збольшага імправізацыя, але ў гэтай плыні гучаць мелодыі Шапэна і Напалеона Орды.
«Тон будзе задаваць менавіта верш, рытміка тэксту, атмасфера тэксту. І фантазія музыкаў, з якімі я граю. У прынцыпе, гэта ўсё імправізацыя, мы не рэпетавалі, я проста сказаў, што хацеў бы пачуць, даў нейкія інструкцыі сваім калегам», – тлумачыць Віктар.
Акампанавалі Віктару ягоны брат Алесь на гітары і кампазітар, хормайстар, піяніст Максім Іўкін, які адмыслова прыехаў з Масквы. Да паэтычна-музычнай імправізацыі далучыўся і танец. Безназоўнае трыа паказала свае пачуцці ў рухах. Танцавальная імправізатарка Ірыніка Басалаева сцвярджае, што ў такім танцы «музыка пачынае весці цела; мы нібыта слухаем не вушамі, а целам; музыка аддаецца ўва ўсім целе, як быццам хвалі нясуць».
Тэксты, музыка, рухі, здаецца, увялі гледачоў у разняволены гіпнатычны стан.
Іншыя тэмы: мінуў год, як не стала народнага паэта Беларусі Ніла Гілевіча. Выстава «Мастак і тэатр», прымеркаваная да Дня тэатру, адкрылася ў галерэі Саюзу дызайнераў.
АД, ІД, «Белсат»
