Медычны імпарт па-беларуску, або як «фірмы-пракладкі» зарабляюць на нас грошы.
Ні для каго не сакрэт, што тыя ж самыя замежныя лекі ў Беларусі ў некалькі разоў даражэйшыя, чым у нашых суседзяў – ва Украіне, Літве ці Польшчы. Такая ж сітуацыя і з пратэзамі. І калі ў вас няма магчымасці прывозіць лекі з-за мяжы, а яны вам патрэбныя, то будзьце гатовыя пераплачваць за іх сотні працэнтаў накруткі.
Васіль Бельмач – былы старшы памочнік Беларускага ваеннага пракурора. Летась спадар Васіль мусіў прайсці аперацыю на тазасцегнавым суставе. Яму паставілі платны замежны эндапратэз.
Калі мужчына паспрабаваў атрымаць дакументы, аказалася, што пратэз не сертыфікаваны і агулам – справа з пастаўкамі еўрапейскіх эндапратэзаў у Беларусь праз Расею вельмі цьмяная. У выніку дзейнасці гэтых схемаў пратэз, які набываецца ў Расеі, скажам, за 1000 еўраў, прадаецца ў Беларусі за 3 500.
Наш калега, журналіст газеты «Наша Ніва» Арцём Гарбацэвіч, не так даўно даследаваў гэтае пытанне. Паводле ягоных словаў, існуе адпрацаваная схема, якая робіць замежныя лекі і пратэзы такімі дарагімі. Вінаватыя ў такой сітуацыі і беларускае заканадаўства, і «нячыстыя на руку» бізнесоўцы, якія, праводзячы тавар праз так званыя «фірмы-пракладкі», накручваюць кошты, а ўвесь прыбытак кладуць сабе ў кішэню.
Напрыклад, у выпадку Васіля Бельмача, пастаўніком пратэза ў 6-ю гарадскую клінічную бальніцу, дзе яму і рабілі аперацыю, была беларуская фірма «МедОрта». Дырэктарка гэтай фірмы, Наталля Казярог, купіла гэтыя пратэзы ў Расеі па вельмі дарагім кошце. Чаму так? Чаму б не купіць у таго, хто прадае тое ж самае, але нашмат танней? Адказ становіцца зразумелым, калі мы даведваемся, што ўласнікам гэтай расейскай фірмы з’яўляецца муж Наталлі, Валеры Казярог.
Дык як жа выглядае медычны імпарт«па-беларуску»? І як працуюць «фірмы-пракладкі»? Адказ – у новым выданні «Людскіх справаў»:
«Людскія справы» глядзіце кожны чацвер а 18:55 на тэлеканале «Белсат» праз спадарожнік «Астра 4A», а таксама онлайн на нашай старонцы.
Пішыце нам у Facebook, Vk ды Одноклассники. Будзьце разам з намі ў суполках у Instagram. Самае цікавае чытайце ў канале Telegram.