Выніковы матэрыял Абʼектыву
Кіраўнік Беларусі паехаў з афіцыйным візітам у Азербайджан. У праграме паездкі – перамовы з прэзідэнтам Азербайджану Ільхамам Аліевым у фармаце «адзін на адзін», а таксама ў пашыраным складзе.
Паводле афіцыйнай версіі, на сустрэчы будуць абмеркаваныя цяперашні стан і перспектывы двухбаковых адносінаў, гандлёва-эканамічная супраца, праца па кааперацыйных праектах, узаемадзеянне ў галіне інвестыцыяў, аграпрамысловы комплекс і нават спорт.
«Калі ў вас ёсць цікавасць на рынку ў Еўропы, ды і не толькі ў Еўропе, давайце сядзем і дамовімся. Мы гатовыя да доўгай перспектывы супрацы з Азербайджанам у выпадку дамоўленасці», – заявіў 28 лістапада Аляксандр Лукашэнка.
Падчас сустрэчы з лідарам Азербайджану Лукашэнка падзякаваў за нядаўнюю пастаўку нафты ў Беларусь: у кастрычніку на Мазырскі НПЗ паступіла каля 85 тыс. тон нафты.
«Вы ня першы раз нас падтрымліваеце, але гэта была разавая падтрымка. Я разумею, што любы вытворца нафты павінен мець стратэгію. Мы гатовы ў гэтым плане прасоўвацца настолькі далёка, наколькі гэта ў інтарэсах Азербайджану», – падкрэсліў Лукашэнка.
У Баку кіраўнік Беларусі заявіў, што партнёрства ў нафтавай сферы – гэта не галоўнае ў адносінах і перамовах паміж Беларуссю і Азербайджанам.
«Лукашэнка прапанаваў перапрацоўваць гэтак званую давальніцкую нафту. Пра гэта раней не гаварылася. Для Лукашэнкі важна ўрэгуляваць пытанне таннейшай нафты і пошук якой-кольвек альтэрнатывы, але не варта звужаць гэты візіт выключна да нафты», – адзначыў у эфіры праграмы «Гарачы каментар» палітолаг Алесь Лагвінец.
Эксперт не выключае, што Аляксандр Лукашэнка паехаў у Азербайджан, каб узяць кароткатэрміновы крэдыт.
Сёлета Расея паставіць Беларусі на 25 % менш нафты, чым абяцала. Эксперты прагназуюць, што гэта прывядзе да ўзмацнення эканамічнага крызісу ў Беларусі.
ЮВ, belsat.eu
