Гарачы каментар «Гэта PR-кампанія, а не дапамога». Чаму Лукашэнка ездзіць па палях


Лукашэнка заявіў, што чыноўнікі або не валодаюць інфармацыяй, або «фальсіфікуюць хаду і вынікі ўборачнай кампаніі». Са словаў Лукашэнкі, яго цікавіць перадусім фінансавы стан сельскае гаспадаркі. Галоўнае – прыбытак і рэнтабельнасць. А з імі ёсць праблемы. Шэф-рэдактарка парталу agrolive.by Іна Гармель разважае ў эфіры «Белсату» пра прыхарошаныя справаздачы, кадравы голад вёскі і PR кіраўніка Беларусі.

Пра кадравы дэфіцыт на вёсцы

У сельскай гаспадарцы ідуць кадравыя скарачэнні, але кваліфікаванай і якаснай працоўнай сілы на сяле па-ранейшаму не хапае. Тэхніка ёсць, але часта за яе няма каго пасадзіць. Таму разнос з боку прэзідэнта лагічны, але для працаўнікоў не надта справядлівы, на мой погляд.

Пра дэзынфармацыю з вёскі

Праблема існуе, яна вельмі даўняя і пры сучаснай сістэме кіравання і, наагул, гаспадаркай, а таксама пры актуальнай палітычнай сітуацыі яе нельга пазбегнуць. Тыя поспехі, пра якія рапартуюць чыноўнікі, у гаспадарцы няма. Але кіраўнік дзяржавы пастаянна росту, паляпшэння эканомікі – таму, каб утрымацца ў сваіх крэслах, яны прыпісваюць. Пры чым, прыпісваюць па ланцужку – пачынаючы з узроўню асобнае гаспадаркі праз узровень вобласці і далей, у Мінсельгасхарч, а потым звесткі паступаюць на больш высокі ўзровень улады.

Пра тое, чаму Лукашэнку ездзіць па палях

Тое, што Лукашэнка выязджае на палі сведчыць, што ён не зусім давярае чыноўнікам. Я б сказала нават, што зусім не давярае. Ён разумее, што яны вымушаныя рабіць прыхарошаныя справаздачы. Кіраўнік Беларусі чытае альтэрнатыўная пункты меркавання, праглядае свабодныя медыі і разумее, што сітуацыя адрозніваецца ад той, якую яму малююць. Гэта заганная практыка, але пры цяперашняй сістэме яе змяніць вельмі складана. Але як «бацька нацыі» ён вымушаны слухаць усе бакі.

Пра PR і сельскую гаспадарку

Кіраўнік Беларусі практыкуе выезды на палі як частку стылю свайго PR-вобразу ад самага пачатку – ён усе кантралюе. Ніжэйшыя чыноўнікі капіююць гэты стыль: стараюцца выязджаць, праводзяць справаздачы ў палявых умовах.

Гэты працэс нагадвае PR-кампанію, а не дапамогу сельскай гаспадарцы. Ён не дапамагае, а замінае аграрыям працаваць: усё ставіцца на вушы, аўрал – гэта не сучасныя метады кіраўніцтва.

Поўную размову з Інай Гармель глядзіце ў «Гарачым каментары»

Каментары