Чыноўніца: у Беларусі не будзе пенсіі, як у Кітаі


Прагноз на будучыню агучыла старшыня Бабруйскага гарвыканкаму.

Гэта адбылося падчас сустрэчы, на якой прысутнічала Таццяна Зялко, прадстаўніца грамадскай арганізацыі пенсіянераў «Наша пакаленне». Жанчына шмат год кансультуе людзей, якія маюць праблемы з пенсіяй. Спадарыня Таццяна была госцем у студыі праграмы «Людскія справы», прысвечанай зменам у пенсійным заканадаўстве Беларусі.

Ад 2015 году дзейнічае новы парадак налічэння працоўных пенсіяў. Змены ў закон аб пенсійным забеспячэнні ўнёс прэзідэнцкі ўказ ад 8 снежня 2014-га.

Сёння для атрымання працоўнай пенсіі трэба мець 15 гадоў «страхавога» стажу. Штогод ён павялічваецца яшчэ на 6 месяцаў, каб з часам дасягнуць 20 гадоў. Акрамя таго, часткі працоўнага стажу пазбавіліся некалькі катэгорыяў грамадзянаў: былыя студэнты і вайскоўцы тэрміновай службы, жанчыны ў адпачынку па доглядзе за дзецьмі ды людзі, якія даглядалі хворых ды інвалідаў. З гэтай прычыны тысячы грамадзянаў патрапілі ў гэтак званую «пенсійную пастку», калі для працоўнай пенсіі ім не хапае стажу.

Пра гэта ў праграме разважае жыхарка Івянца Ірына Лотыш. Ёй 57 гадоў, яна мае 29 гадоў агульнага працоўнага стажу і аніякай пенсіі. Гады догляду за бацькам – інвалідам І групы – у гэты стаж не ўлічылі, а сацыяльная пенсія па ўзросту для жанчыны налічваецца толькі з 60 гадоў.

Ірына Лотыш, змагаецца за права атрымліваць пенсію. Фота belsat.eu

«Гэтыя ўказы – яны адмянілі тое пенсійнае заканадаўства, якое было пры маім жыцці. Мне адмовілі ў пенсіі паводле закону, якога ўвогуле не існавала. Якога я не магла і ўжо не магу выканаць паводле свайго ўзросту».

Цяпер Ірына Лотыш судзіцца з уладамі за права атрымоўваць заслужаную пенсію. Паводле яе, спроба змагацца з уладамі прывяла да таго, што яе спрабавалі прымусова адправіць у псіхіятрычны шпіталь у Навінкі. Аднак жанчына збіраецца і надалей змагацца за свае правы.

Другая гераіня «Людскіх справаў» – Марына Яску з аграгарадка Слабада Смалявіцкага раёну. Яна выгадавала чацвярых уласных дзяцей, жыла ў вёсцы, трымала вялікую гаспадарку. Але ні гады студэнцтва, ні догляд за дзецьмі ў працоўны стаж не ўлічаны, і ў выніку – на працоўную пенсію жанчына за сваё жыццё не зарабіла. Цяпер Марына лічыцца працаўладкаванай – мамай дзіцячага дому сямейнага тыпу. Аднак кожны год працоўны стаж у краіне павялічваецца, і жанчына ня ведае, ці здолее яго «дагнаць», каб мець права на працоўную пенсію.

Поўнае выданне праграмы «Людскія справы» глядзіце тут: