Агляд падзеяў культуры Беларускі Шагал Марціновіча


 Віктар Марціновіч у Вільні прэзентаваў кнігу-даследаванне пра аднаго з самых выбітных мастакоў Беларусі ХХ стагоддзя. Цягам 15 гадоў публіцыст збіраў звесткі, каб напісаць навуковае даследаванне пра слыннага мастака з Беларусі «Радзіма: Марк Шагал у Віцебску».Шагал вучыўся ў Ю́даля Пэна ў Віцебску, падчас Першай сусветнай і ў пасляваенны час жыў у Беларусі. Віцебск пакінуў выразны след у ягонай душы і творчасці. Які? – задаўся пытаннем В. Марціновіч. «Ён быў не паспяховым. Гэта былі найбольш балючыя моманты ягонага жыцця, тое, што ён перажыў у Віцебску. І таму, відавочна, гэта яскравы прыклад таго, што адбываецца з геніем у правінцыі». На прэзентацыі ў Вільні прысутнічалі і сябры Беларусі з іншых краінаў. «Беларусы павінны ведаць сваіх герояў, – зазначае Стэфан Эрыксан, экс-амбасадар Швецыі ў Беларусі. – Менавіта Шагал з’яўляецца адным з самых вялікіх людзей, якія нарадзіліся ў Беларусі».

«Я даведалася пра творчасць Шагала, пра беларускіх мастакоў, як складаўся іх лёс, пра лёс цяперашніх беларускіх мастакоў, якія не выязджаюць за мяжу, але ўжо знакамітыя», – распавядае польская паэтка Аліна Лясота. Кніга Віктара Марціновіча больш нагадвае мастацкую літаратуру, чымся навуковую працу. Дзяніс Кучынскі, прэзідэнт Студэнцкага прадстаўніцтва ЕГУ: «Ты чытаеш экспрэсію аўтара, бачыш у ёй драму, разумееш гэтую драму праз прызму Беларусі, праз тое, што адбылося ў Беларусі».

Шагал нярэдка ўспрымаецца як расейскі і французскі мастак. У беларускім асяроддзі шырокая зацікаўленасць творцам з’явілася ў апошнія гады.Сяргей Харэўскі, мастацтвазнаўца: «Гэта яшчэ адзін крок да вяртання Шагала ў беларускі кантэкст».Кніга выйшла ў выдавецтве ЕГУ. Сігнальны наклад хутка разышоўся, бліжэйшым часам з’явяцца яшчэ і ілюстраваныя выданні. Кнігу «Радзіма: Марк Шагал у Віцебску» можна будзе набыць у бібліятэцы ЕГУ.Іншыя тэмы: «Крок» Строцава – прэзентацыя новай кнігі паэта. Як захаваць вернасць сабе і сумясціць моду, неабходнасць зарабіць і вольную творчасць? Адказы шукае новы дакументальна-музычны фільм «Унутранае».Ганна Русінава, Вольга Гардзейчык, «Белсат»

Каментары