Гарачы каментар Алег Воўчак: «Рэйтынг Следчага камітэту – вельмі нізкі»


У эфіры «Гарачага каментару» Валер Руселік абмяркоўвае барацьбу з карупцыяй, праактыўную прысутнасць у Беларусі прарасейскіх згуртаванняў і прычыны перастаноўкі Лукашэнкам кадраў пасля выбараў з Алегам Воўчакам.Тыдзень таму Аляксандр Лукашэнка звольніў кіраўніка Следчага камітэту Валянціна Шаева. Сёння на нарадзе па пытаннях нацыянальнай бяспекі прэзідэнт прызначыў новага кіраўніка СК. Ім стаў пракурор Берасцейшчыны Іван Наскевіч.«Адной з галоўных прычынаў змены кіраўніка следчага камітэту – масавая незадаволенасць людзей працай гэтай структуры»,– кажа былы следчы пракуратуры, праваабаронца Алег Воўчак. «Беларусы скардзяцца на следчых не толькі праваабаронцам, але дасылаюць лісты ў Адміністрацыю прэзідэнта», – заўляе эксперт. Воўчак нізка ацэньвае эфектыўнасць айчыннага СК:

«Вялікі штат, шмат функцыяў, якія дублююцца, а таксама слабая падрыхтоўка аператыўных супрацоўнікаў, не кажучы ўжо пра следчых. Няма школы, якая б займалася якаснай падрыхтоўкай следчых. Стварэнне акадэміяў следчых у Грузіі і ва Ўкраіне адразу палепшыла сітуацыю з расследаваннем самых заблытаных справаў».

Да таго трэба дадаць адсутнасць незалежнасці следчых і аператыўнікаў у беларускай дзяржаве.Воўчак прызнаўся, што прапанаваў уладам свой план рэформаў следчай сістэмы, які ўлічвае замежны досвед, і спадзяецца на тое, што ўлады прыслухаюцца да яго. Адным з вынікаў рэформаў павінна стаць змяншэнне або знікненне карупцыі ў праваахоўнай сістэме:«Сёння частку кампетэнцыяў выканаўчай улады трэба перадаць прадстаўнічай уладзе і грамадзянскай супольнасці – тады мы адразу пераможам карупцыю або, прынамсі, будзем здольныя яе кантраляваць», – кажа госць «Гарачага каментару».

Каментары