У Беларусі захоўваецца толькі невялікая частка спадчыны Францыска Скарыны. Але цяпер мы можам пабачыць усе 25 кніг першадрукара пад адной вокладкай – у выданні, якое прэзентавалі ў Нацыянальным музеі.
Шыкоўны альбом з мноствам ілюстрацыяў называецца «Сусветная спадчына Францыска Скарыны», бо кнігі першадрукара расцярушаныя па ўсёй Еўропе. Дакладна ацаніць іх колькасць навукоўцы не могуць, але на сёння вядома пра 519 асобнікаў, большасць з якіх – у фондах Расеі. У Беларусі захоўваецца толькі дзесяць. Выданне займальна расказвае і паказвае гісторыю кожнай кнігі, кажа ўкладальнік Алесь Суша:
«Мы правялі грунтоўнае навуковае даследаванне, якое заняло некалькі год працы, знайшлі і дэталёва апісалі на ўзроўні кожнага асобніка кнігі са збораў Беларусі, Расеі, Украіны, Літвы, Польшчы, Славеніі, Германіі, Даніі, Брытаніі, то бок фактычна з усёй Еўропы».
Альбом дапаможа спасцігнуць сусветна значную спадчыну Скарыны, у якой яшчэ шмат загадак, не толькі беларусам, але і замежнікам. Таму выданне на трох мовах – беларускай, расейскай і англійскай. Алесь Суша падкрэсліў аўтэнтычнасць выгляду скарынаўскіх кніг:
«Унікальнае і першае альбомнае выданне паказвае кніжную спадчыну першадрукара такой, як яна ёсць: кавалкамі, фрагментамі, падранымі аркушамі, пераплеценымі разам з іншымі кнігамі, замучанымі часам, расфарбаванымі ўладальнікамі, у самых розных пераплётах».
Кніга выйшла ў выдавецтве «Беларуская энцыклапедыя» на замову Міністэрства інфармацыі і нядаўна ўзяла гран-пры Міжнароднага конкурсу краін СНД «Мастацтва кнігі – 2017».
Сёлета ў Беларусь прыедуць арыгіналы некаторых скарынаўскіх выданняў – 14 верасня ў межах Міжнароднага кангрэсу, прымеркаванага да 500-годдзя беларускага кнігадруку, адкрыецца маштабны выставачны праект, дзе ўпершыню будуць прэзентаваныя кнігі Скарыны з некалькіх краінаў свету.
ГЛЯДЗІЦЕ ТАКСАМА:
Сябе ён называў апавядальнікам. Янку Брылю – 100 гадоў.
Украінскі досвед мастацкай самаарганізацыі – для незалежнасці.
Эні-бэні-рыкі-такі… Фестываль забытых гульняў у сталіцы.
Аляксандра Дорская, Вольга Гардзейчык, «Белсат»
