Жыхар прыватнага сектару ў цэнтры Менску: калі мяне знясуць і я атрымаю кватэру, то на другі ж дзень памру


На аўкцыёне прадаюць участкі зямлі, на якіх жывуць людзі. Кампенсацыя за прыватны дом складае ўсяго 500 долараў за метр, хоць сярэдні кошт кватэры нават гэтак званай «хрушчоўцы» вышэйшы.

Тэрыторыю прыватнага сектару ў цэнтры сталіцы, абмежаваная вуліцамі Бяды, Лук’яновіча, 2-ою Пасялковай і завулкам Усходнім, выставілі на аўкцыён. Жыхары прыватных дамоў даведаліся пра гэта выпадкова… ад журналістаў.

Жыхары прыватнага сектару ледзь не 40 гадоў сутыкаліся з перашкодамі, калі спрабавалі прапісаць да сябе сваякоў або пабудаваць новы пакойчык. Чыноўнікі іх папярэджвалі, што падчас зносу новых прыбудоваў улічваць не будуць. Цяпер настаў гэты час, і людзі даведаліся, што кампенсацыю яны атрымаюць з разліку 500 долараў за квадратны метр.

ГЛЕБ ТУРЧЫК, ЖЫХАР ПРЫВАТНАГА СЕКТАРУ:

«Калі тут пабудуюць дзевяціпавярховік, то я змагу набыць за тую кампенсацыю ў ім кватэру? Мяркую, што яны будуць прадаваць значна даражэй кватэры ў доме, які будзе тут стаяць. Ну дык тады пытанне: навошта мне адсюль з’яжджаць? Я тады лепш буду жыць у сваім доме».

Згодна з сярэднімі коштамі на кватэры, квадратны метр у цэнтры сталіцы ў гэтак званай «хрушчоўцы» каштуе значна больш. Што ж казаць пра новыя дамы падвышанага камфорту?

ДЫЯНА ВАЙТОВІЧ, ЖЫХАРКА ПРЫВАТНАГА СЕКТАРУ:

«За тыя грошы, якія нам дадуць у якасці кампенсацыі за наш дом, мы зможам набыць толькі нейкую маленькую хрушчоўку на ўскрайку гораду. Цяпер жа ў нас дом у цэнтры гораду. Мы маем паркоўку, месца для выгулу сабак. У нас ёсць двор, каб гуляць з дзіцём».

На Усходнім завулку ёсць дамы, якія пабудавалі яшчэ ў 1939 годзе. Такі дом у Анатоля Бярновіча. Бярвенне для яго прывезлі з вёскі пад Менскам. Потым яго перараблялі, дабудоўвалі. У доме цяпер жыве сам спадар Анатоль са сваёй жонкай і двума дарослымі сынамі.

АНАТОЛЬ БЯРНОВІЧ, ЖЫХАР ПРЫВАТНАГА СЕКТАРУ:

«Для мяне гэта забойства. Калі скажуць, што будуць знасіць… Я ўжо гаварыў сваім, што, калі мяне знясуць і я атрымаю кватэру, то на другі ж дзень у той кватэры я памру».

Але знайшліся і такія жыхары пасёлку, якія вітаюць знос, каб развязаць кватэрнае пытанне для сваёй сям’і. Надзея Папко ў свой час нават склікала адмысловую камісію, каб прапісаць роднага ўнука. А цяпер у доме засталіся адныя жанчыны – гаспадыня і дзве ейныя дачкі.

НАДЗЕЯ ПАПКО, ЖЫХАРКА ПРЫВАТНАГА СЕКТАРУ:

«Што мы заслужылі, то нам і дадуць. Думаю, што кожнай дачцэ па кватэры. Мы ж не бясплатна. У нас жа ёсць тут і зямля 6 сотак».

Аўкцыён адбыўся ў панядзелак. Пакуль не знайшлося пакупнікоў на гэтую тэрыторыю. Наступны аўкцыён будзе праз месяц. Звычайна з кожным новым аўкцыёнам кошт зямлі зніжаецца. Магчыма, калі ён дасягне мінімуму, грамадзкасць даведаецца, хто ж набыў той прынадны кавалак.

Забудоўнік мусіць скампенсаваць людзям страты ў выпадку зносу іхных дамоў. Але далёка не ўсе вераць, што тая кампенсацыя будзе справядлівая.

Любоў Лунёва, «Белсат»

Стужка навінаў