Нашага калегу Станіслава Івашкевіча пакаралі штрафам у 20 базавых велічынь (420 рублёў) за сюжэт пра вёску пад Лідай, што тоне ў гноі, які трапляе ў наваколле з мясцовага свінакомплексу.
Сюжэт выйшаў у эфір напрыканцы чэрвеня і неўзабаве Івашкевічу даслалі позву з патрабаваннем зʼявіцца ў міліцыю для складання пратаколу. Журналіста абвінавацілі ў «незаконным распаўсюдзе прадукцыі СМІ» (арт. 22.9 КоАП) і працы без акрэдытацыі.
Сёння суддзя Лідскага раённага суду Сяргей Піпко прыняў рашэнне пакараць нашага калегу штрафам у памеры 20 базавых велічынь альбо 420 рублёў.
«Тое, што пастанова будзе не на маю карысць, не стала сюрпрызам. Але трэба адзначыць, што Лідскі суд вынес мінімальнае магчымае пакаранне – штраф у 20 базавых. На маю думку, гэта можа сведчыць пра іх разуменне важнасці праблемы, паколькі яны самі жывуць у мясцінах, забруджаных тым свінакомплексам, пра які вядзецца ў рэпартажы. У тэлефонных размовах са мной і суддзя, і міліцыянт, які рыхтаваў справу, падкрэслівалі, што ня маюць пытанняў да праўдзівасці і важнасці матэрыялу, а выключна да фармальнага парушэння – працы без акрэдытацыі», – каментуе рашэнне суду Станіслаў Івашкевіч.
Рэпартаж пра кепскія экалагічныя ўмовы ў вёсцы пад Лідай атрымаў рэзананс. Праўда, замест захадаў, якія спынілі б забруджванне навакольнага асяроддзя, улады вырашылі абвінаваціць журналіста.
«Калі мы рабілі рэпартаж пра гэты свінакомплекс, мы звярнуліся ў лідскую інспекцыю аховы навакольнага асяроддзя і выехалі з імі на праверку. У нашай рэдакцыі ёсць дакумент з вынікам інспекцыі. Згодна з ім, канцэнтрацыя шкодных рэчываў у рацэ перавышае норму ў сотні разоў. Амонія-іону – у 260, а фасафат іона – у 300 разоў. Аднак судзяць сёння не кіраўніцтва свінакомплекса, а журналіста. А праблема з забруджваннем застаецца нявырашанай», – гаворыць Івашкевіч.
Што ж тычыцца акрэдытацыі, то, паводле слоў журналіста, раней ён яе меў. Але пасля расследавання аб карупцыі ў Белэнерга дазвол на працу ў Беларусі Івашкевічу не працягнулі.
«Нашай рэакцыяй на гэты ціск будзе яшчэ большая актывізацыя высілкаў у сваёй працы», – упэўнена кажа ён.
***
Нагадаем, за 2017 год журналістаў і аператараў нашага тэлеканалу неаднаразова затрымлівалі, штрафавалі і нават каралі адміністратыўным арыштам. Самая распаўсюджаная прэтэнзія ўладаў да іх – праца без акрэдытацыі і нібыта незаконны выраб і распаўсюд прадукцыі СМІ.
КА, belsat.eu
