Журналіст «Белсату» пабываў на гарбаце ў Гэндальфа (ФОТА+ВІДЭА)

video

Журналіст «Белсату» і вядоўца праграмы «Медыі з Ражковым» Алег Ражкоў пабываў у гасцях у знакамітага брытанскага актора Іяна МакКелена, які праславіўся выкананнем ролі чараўніка Гэндальфа ў серыі фільмаў паводле трылогіі «Уладар пярсцёнкаў».

Журналіст «Белсату» Алег Ражкоў і сэр Іян МакКелен

Журналіст «Белсату» Алег Ражкоў і сэр Іян МакКелен

Іян МакКелен, які мае шляхецкі тытул «сэра», аказаўся вельмі гасцінным і ветлівым гаспадаром. На прыёме ў ягоным доме было больш за 20 чалавек, але ён нікога не абмінуў сваёй увагай.

Прыём у сэра Іяна МакКелена

Прыём у сэра Іяна МакКелена 

Дом сэра МакКелена знаходзіцца амаль у самым цэнтры Лондану, на беразе Тэмзы. Будынак звонку непрыкметны, але надзвычай прыгожы ўнутры. У пакоях шмат скульптур ды арт-абʼектаў, на сценах карціны ды чорна-белыя фотаздымкі, памятныя для актора. Бачна, што кожная рэч старанна падабраная. Але атмасфера ў доме ўсё ж не столькі музейная, колькі ўтульная.

Дом сэра Іяна МакКелена знаходзіцца на беразе Тэмзы

Дом сэра Іяна МакКелена знаходзіцца на беразе Тэмзы

З вітальні ёсць выхад на тэрасу. Краявід з яе такі, што нават у дождж зусім не хочацца з яе сыходзіць. Цікава, што адтуль бачны самы высокі будынак у Вялікай Брытаніі – «The Shard», які ўначы чымсьці нагадвае Вока Саўрона.

У асабістай размове сэр Іян МакКелен аказаўся простым і вельмі далікатным. Калі ён даведаўся, што я ў дзяцінстве захапляўся светам, які стварыў Джон Толкін у сваіх кнігах, то схапіў мяне за руку і павёў на іншы паверх.

Артэфакты са здымкаў

Артэфакты са здымкаў

У асобнымі пакоі былі сабраныя артэфакты, якія засталіся са здымкаў розных стужак. Так, у скрыні з парасонамі быў меч чараўніка Гэндальфа, а на паліцы ляжаў ягоны шэры капялюш. Ён апрануў яго на мяне і сказаў: «Ну, вось цяпер і ты можаш пабыць чараўніком». Мы пасмяяліся ды запісалі жартаўлівае відэа, у якім я кажу, што спазніўся на самалёт у Менск, і прашу выклікаць для мяне казачных арлоў са стужкі. На што Гэндальф мне адказаў: «Яны досыць далёка, але зараз я ім патэлефаную».

Статуэткі Гэндальфа ўдома ў актора

Статуэткі Гэндальфа ўдома ў актора

Вярнуўшыся ў Менск, я ўзгадаў, што забыў у доме актора торбу з надпісам «Цытуй сваё», так што цяпер нешта беларускае засталося і ў пакоях Гэндальфа.

Алег Ражкоў, belsat.eu

Глядзі таксама
Каментары