Жанчыны, якія пачалі галадоўку ў Калінкавічах і Пухавічах: «Мы паедзем у Адміністрацыю прэзідэнта галодныя»
Напрыканцы першага дня галадоўкі (27 красавіка) да жанчын, чые сваякі адбываюць пакаранне за ўжыванне наркатычных сродкаў (артыкул 328 Крымінальнага кодэксу), прыйшоў старшыня Калінкавіцкага райвыканкаму Сяргей Гвоздзь і старшыня мясцовага савету дэпутатаў Віктар Замосцік.
Нагадаем, што ў Калінкавічах і Пухавічах распачаліся бестэрміновыя галадоўкі актывістак руху «Маці 328». Яны дамагаюцца змякчэння пакарання па крымінальным артыкуле 328.
Чыноўнікі прапанавалі жанчынам сустрэцца 2 траўня з кіраўніцаю Адміністрацыі прэзідэнта Наталляй Качанавай.
Удзельніцы галадоўкі заявілі, што «Качанава нічога не вырашае» і выставілі свае патрабаванні. Яны склалі спіс чыноўнікаў, якіх хацелі б убачыць на сустрэчы:
- Аляксандр Лукашэнка
- кіраўнік МУС
- старшыня Вярхоўнага Суда
- старшыня Палаты прадстаўнікоў
- кіраўнік СК
- генеральны пракурор
- старшыня Савета Рэспублікі
- старшыня Савета бяспекі
«Мы паедзем туды галодныя. Мы не спыняем галадоўку, – кажа Таццяна Канеўская з Гомля. – Яшчэ адна нашая ўмова, каб на сустрэчы былі незалежныя журналісты, бо ў нас няма даверу да дзяржаўных СМІ. Добра, што ўлады нарэшце нас пачулі і самі прапануюць сустрэчу. Спадзяюся, што і два другія пункты яны таксама пачнуць выконваць – перагляд крымінальных справаў асуджаных за наркотыкі і змены ў наркатычнае заканадаўства ў бок змяншэння тэрмінаў зняволення, а таксама ўвядзенне дыферэнцыяцыі пакарання ў залежнасці ад ступені віны».
28 красавіка адной з удзельніц галадоўкі стала дрэнна. Ёй выклікалі хуткую.
ЮВ, Ларыса Кавальчук, belsat.eu
