Землятрус у Эквадоры: загінулі больш за 230 асобаў


Землятрус на ўзбярэжжы Ціхага акіяну здарыўся ў нядзелю ўночы.

Без электрычнасці застаюцца некалькі гарадоў. Краіна рыхтуецца да цунамі.

У выніку наймацнейшага за апошнія дзесяцігоддзі землятрусу ў Эквадоры магнітудаю 7,8 загінулі каля 230 асобаў.

Прэзідэнт Рафаэль Карэа абвесціў надзвычайнае становішча ў краіне і заклікаў нацыю не хвалявацца.

Прэзідэнт Эквадору спыніў свой візіт у Італіі і вярнуўся дадому.

«Выказваю бясконцую любоў усім семʼям загінулых», – напісаў ён у «Тўітэры».

Паводле Геалагічнай службы ЗША, эпіцэнтр землятрусу быў на ўзбярэжжы, за 27 кіламетраў ад гораду Муйснэ.

У выніку землятрусу ў некалькіх гарадах краіны адсутнічае электрычнасць. Уведзены рэжым надзвычайнай сітуацыі, мабілізаваная паліцыя і Нацыянальная гвардыя.

Землятрус адчуваўся ў эквадорскай сталіцы Кіта, гарадах Гуаякіль, Эсмэральдас, Лёха, Ібара і, перадусім, у Партавіеха, дзе стыхія пашкодзіла электрасеткі і пакінула без святла некалькі раёнаў гораду.

У Эквадоры і Перу абʼяўленая пагроза цунамі.

ДД

Тэгі: 
Глядзі таксама
Каментары