Рада БНР выступіла з заявай наконт сітуацыі вакол тэлеканалу «Белсат».
Рада БНР сур’ёзна занепакоеная паведамленнямі аб пагрозе існаванню тэлеканалу «Белсат».
За гады сваёй працы «Белсат» стаў адным з найбольш уплывовых беларускіх СМІ, вельмі яскравай і вельмі важнай зʼявай у беларускай медыйнай прасторы. Гэта ўнікальная пляцоўка для выказвання незалежнай ад уладаў думкі.
«Белсат» – адзіны ў свеце тэлеканал, які вяшчае на беларускай мове. Калектыў «Белсату» стварыў выдатныя перадачы і дакументальныя фільмы. Ва ўмовах панавання ў Беларусі дыктатарскага рэжыму, які займаецца дыскрымінацыяй беларускай мовы і беларускай культуры, працягвае савецкую шавіністычную палітыку русіфікацыі і знішчэння беларускасці, «Белсат» грае вялізную ролю ў якасці не толькі СМІ, але і як культурніцкая зʼява.
Стварэнне і падтрымка «Белсату» – гэта неацэнны ўнёсак Польшчы ў падмурак беларуска-польскага сяброўства. Дзякуючы «Белсату» Польшча замацавала падтрыманне сярод найбольш прагрэсіўнай часткі беларускага грамадства. Беларусы заўжды будуць удзячныя Польшчы за «Белсат».
Закрыццё тэлеканалу альбо яго перафарматаванне было б сур’ёзным ударам па свабодзе слова ў Беларусі і згуляла б на карысць дыктатарскаму рэжыму Аляксандра Лукашэнкі ў Беларусі і ягоным традыцыйным спонсарам – агрэсіўным расейскім нацыяналістычным элітам. Гэта было б ударам па інтарэсах дэмакратыі і бяспекі ў нашым рэгіёне.
Рада БНР звяртаецца да ўладаў Польшчы і да Еўрапейскага Звязу з просьбай падтрымаць далейшае існаванне тэлеканалу «Белсат» як незалежнага беларускага беларускамоўнага тэлеканалу.
Рада Беларускай Народнай Рэспублікі – найвышэйшы кіраўнічы орган БНР, які з 1919 года дзейнічае на эміграцыі і ўяўляе сабой адну з ключавых палітычных арганізацыяў беларускай дыяспары. Рада БНР захоўвае фармальна-працэдурную пераемнасць з радай Першага Усебеларускага кангрэсу 1917 года і па стане на 2015 год зʼяўляецца самым старым у свеце «урадам у выгнанні».
МЯ, belsat.eu