У суботу, а 19:25, глядзіце дакументальную стужку «Помста армянаў: справа Тэхлір’яна» па тэлевізары і анлайн. Яна пралівае святло на гісторыю складаных адносінаў з Турцыяй.
У 1921 годзе на вуліцы Берліну стрэлам у галаву сярод белага дня студэнт забівае былога кіраўніка ўраду Турцыі, адказнага за генацыд армянаў у Асманскай імперыі.
Тэму злачынства падхоплівае нямецкая і міжнародная прэса. Ахвяра – Талят-Паша, былы кіраўнік турэцкай дзяржавы, а ягоны забойца – малады армянін Сагамон Тэхлір’ян. Праз некалькі тыдняў над ім пачынаецца суд.
Гэты суд натхняе маладога польскага адваката Рафаэля Лемкіна стварыць прававыя рамкі для падобных справаў. Пазней Рафаэль Лемкін увядзе ў міжнародную прававую практыку тэрмін «генацыд». На падставе ягоных працаў будуць створаныя прынцыпы новага міжнароднага Крымінальнага кодэксу, якім карыстаюцца і сёння падчас расследаванняў фактаў генацыду ці злачынстваў супраць чалавечнасці.