Паведамленні аб спыненні крымінальнага пераследу з прычыны адсутнасці ў іх дзеяннях складу злачынства атрымалі актывісты Маладога Фронту Зміцер Крамянецкі, Уладзімір Яроменак і Арцём Леўчанка.
Адпаведныя паперы з КДБ атрымалі раней Зміцер Дашкевіч, Сяргей Пальчэўскі, Раман Васільеў.
- «Высмакталі з пальца». Што будзе далей са «справаю патрыётаў» і абвінавачанымі?
- Вакульчык пра «справу патрыётаў»: Заўчасна казаць, ці дойдзе яна да суда
Зыходзячы з паведамленняў пра тых, з каго таксама знятыя ўсе абвінавачанні – Мікалая і Яна Міхальковых, Сяргея Кулініча, можна меркаваць, што крымінальны пераслед спыняецца ў дачыненні толькі да тых фігурантаў справы «аб падрыхтоўцы масавых беспарадкаў», якім не было прад’яўлена дадатковае абвінавачанне па артыкуле 287 КК «Стварэнне незаконнага ўзброенага фармавання», – піша ПЦ «Вясна».
Агулам па справе патрыётаў напярэдадні 25 сакавіка сёлета арыштавалі больш трыццаці асобаў. Частцы асобаў выставілі абвінавачанні ў рыхтаванні масавых закалотаў, колішнім сябрам «Белага легіёну» дадалі яшчэ і артыкул «стварэнне незаконнага ўзброенага фармавання».
Затрыманні пачаліся пасля заявы Аляксандр Лукашэнкі пра групу, якая рыхтавала масавыя беспарадкі ў краіне. Цягам двух месяцаў большую частку затрыманых ужо выпусцілі, з некаторых з іх знялі абвінавачанні. Цяпер пад вартай знаходзяцца 14 асобаў. Грамадскія дзеячы і праваабаронцы заклікалі прызнаць палітвязнямі фігурантаў «справы патрыётаў».
ДР belsat.eu
