Лідар Абʼяднанай грамадзянскай партыі сустрэўся са старшынём Канстытуцыйнага суда Пятром Міклашэвічам. Палітык распавёў пра тое, што адбылося на спатканні.
«Ёсць такое правіла, негалоснае, пасля афіцыйных сустрэчаў з прадстаўнікамі ўлады даваць пазітыўна-нейтральныя каментары. На ўсялякі выпадак, раптам прыдасца. Пасля камунікацыі са старшынём Канстытуцыйнага суду я скажу, як ёсць. Гэта сапраўды было, як падарожжа на тарлейбусе ў далёкія 80-я», – піша на сваёй старонцы ў «Facebook».
Лідар партыі АГП пайшоў на сустрэчу з кіраўніком суда, каб абмеркаваць ініцыятыву пра скасаванне дэкрэту аб «дармаедстве», паводле якога грамадзяне, якія нідзе не працуюць і не плоцяць падаткі, маюць сплочваць адмыслова ўстаноўлены збор. З допісу палітыка вынікае, што ініцыятыва не знайшла разумення ў старшыні суду.
«Пётр Пятровіч быў адвакатам. Адвакатам сістэмы! – піша Анатоль Лябедзька. – Ён згадваў (як падалося, з настальгіяй), як у савецкія часы адпраўляў дармаедаў за краты. Ён апетытна перажоўваў тэму бясплатнай адукацыі, медыцыны, тэзіс, што ўсе абавязаныя ўдзельнічаць у напаўненні бюджэту».
«На цуд чакаць не варта. За шыльдаю «Канстытуцыйны суд» – чыноўнікі на кантракце, адвакацкая кантора цяперашняй сістэмы», – рэзюмуе палітык і заклікае спампаваць і падпісацца пад зваротам да Канстытуцыйнага суда ды выйсці на «Марш дармаедаў» 15 сакавіка.
МЛ, belsat.eu