Ніякія.
У сёлетні т. зв. Шанхайскі рэйтынг не ўвайшла ніводная беларуская высокая школа.
Не ўвайшла традыцыйна: з 2003 года, калі пачаў складацца Акадэмічны рэйтынг сусветных універсітэтаў, беларускіх вучэльняў там не было.
Пры складанні Шайханскага рэйтынгу пад увагу бяруць шэсць аб’ектыўных паказчыкаў – між іншага, колькасць выпускнікоў і працаўнікоў, якія атрымалі Нобэлеўскую і Філдсаўскую ўзнагароды або колькасць артыкулаў, апублікаваных у часопісах Nature і Science.
З нашых суседзяў у сёлетні спіс патрапілі толькі тры расейскія і два польскія ўніверсітэты.
Найвыйшэй забраўся Маскоўскі дзяржаўны ўніверсітэт (87-е месца). Санкт-Пецярбургскі дзяржаўны ўніверсітэт апынуўся ў чацвёртай сотні, Новасібірскі – у пятай. (Дарэчы, у нацыянальным расейскім рэйтынгу гэтыя высокія школы займаюць адпаведна першы, другі і трэці радок.)
Варшаўскі і Ягелонскі ўніверсітэты ў нацыянальным рэйтынгу Польшчы цягам апошніх год дзеляць 1–2. месцы, але ў Шанхайскім рэйтынгу іх можна знайсці на пазіцыях 301–400.
Узначальвае Шанхайскі рэйтынг Гарвардскі ўніверсітэт.
ДД, belsat.eu