Пасля заканчэння Менскіх перамоваў журналістка расейскага афіцыйнага каналу «Россия 24» намагалася задаць пытанне прэзідэнту Украіны Пятро Парашэнку. Карэспандэнтку цікавіла, як украінскі лідар ацэньвае вынікі перамоваў. Адзін з ахоўнікаў не даў закончыць пытанне, даволі моцна прыціснуўшы галаву журналісткі да сябе, падае «17-ты канал».
Мяркуючы па ўсім, ахова проста хацела апярэдзіць верагодную правакацыю з боку расейскіх медыяў, падае inforesist.org. 11 лютага журналіст тэлеканалу «Россия» Павал Зарубін сустрэў прэзідэнта Украіны Пятра Парашэнку каля Палаца незалежнасці выкрыкам: «Навошта вашы войскі бамбуюць мірнае насельніцтва Данбасу?». Парашэнка нічога не адказаў. Журналіста адхілілі ад асвятлення саміту і вывелі праз чорных ход. Крыху пазней прадстаўнік расейскага тэлеканалу «Лайфньюз» у літаральным сэнсе пачаў гаўкаць на журналістак з украінскага тэлебачання.
МЯ, belsat.eu, паводле «17-ты канал», inforesist.org
