Як беларускія бізнесоўцы ўцякаюць у Літву


Непрадказальная эканамічная сітуацыя ў Беларусі, Расеі і Украіне прымушае бізнесоўцаў шукаць ціхай гавані для сваіх грошай ды ідэяў у краінах Захаду. З кожным годам колькасць фірмаў, што пераехалі з краінаў СНД у Літву, павялічваецца.

Летась літоўскія органы міграцыі выдалі расейцам, беларусам і ўкраінцам амаль 15 тыс. відаў на жыхарства. У большасці выпадкаў замежнікі просяць дазволу жыць у Літве, каб працаваць. Кіраўніца кансалтынгавай кампаніі Святлана Кандратовіч адзначае, што гэта выдатная стартавая пляцоўка для выхаду на заходнія рынкі.

Летась Літва заняла 28-е месца ў сусветным рэйтынгу канкурэнтаздольнасці ад IMD. Не спыняе бізнес нават тое, што фірма замежніка мусіць валодаць мінімальным капіталам € 14 тыс. і наняць трох літоўскіх грамадзянаў. У Літву пераязджаюць кампаніі аптовага гандлю, вытворчыя, лагістычныя фірмы.

Знаходзяць сябе ў Балтыі і стартапы. Дэвелопер Раман Уласаў пачынаў распрацоўваць гульні ў Менску, аднак студыю «Jet Cat Games» разам з трыма аднадумцамі заснаваў менавіта ў Вільні. Маладзёны засяродзіліся на папулярных цяпер тактычных онлайн-гульнях і стварылі праект «Heliborne» – верталётную стратэгію.

Менавіта «Jet Cat Games» першыя заваявалі інвестыцыі фонду «Practica Capital» на € 100 тыс.

РАМАН УЛАСАЎ, СУЗАСНАВАЛЬНІК «JET CAT GAMES»:
«Літва маладая, дзяржава дапамагае, спрабуе нешта збудаваць, гэта цікава, у Расеі і Беларусі такога няма».

Толькі за паўтара года ў Літву перабраліся не менш за 10 кампютарных студыяў з Беларусі, Расеі ды Украіны. У Літве рады бачыць людзей з цікавымі задумамі, бо гэта прыносіць плынь фінансаў ды здаровую канкурэнцыю. У той жа час нашая краіна праз адсутнасць спрыяльных умоваў штогод губляе дзясяткі карысных кадраў для сваёй эканомікі.

Настасся Яўмен, «Белсат», Вільня

Глядзі таксама
Каментары