Лявон Вольскі зняў відэа ў кватэры Караткевіча


Лявон Вольскі выклаў у сеціва акустычнае відэа песні «Калі ідуць на абардаж» на словы Уладзіміра Караткевіча, знятае ў кватэры пісьменніка.

Песня прагучыць 21 верасня на вялікім сольным канцэрце ў «Prime Hall».

Здымкі адбыліся ў кватэры пісьменніка на Карла Маркса 36, дзе Уладзімір Сямёнавіч Караткевіч жыў з 1973 года. Адсюль і адправіўся ў свой апошні шлях 25 ліпеня 1984 года.

У кватэры жыла сястра Караткевіча, зараз жыве яго пляменніца – Алена, разам з мужам.

У кабінеце амаль нічога не змянілася з дня смерці Караткевіча. Музею тут няма, але кабінет захоўваецца. Амаль усё засталося на сваіх месцах. Ложак, гліняная пагоня над ложкам. Кніжныя паліцы з мноствам самых розных кніг. На сваім месцы стаіць стол, за якім пісаўся «Чорны замак Альшанскі». Вісіць вялікі партрэт Каліноўскага.

«Гэта была спантанная ідэя. Песня з іншага праекту, але яна абсалютна ў кантэксце «Белай яблыні грому», таму абавязкова прагучыць на канцэрце 21 верасня. Калі гралі, адчулі нейкую дзіўную энергетыку. Не ведаю, як патлумачыць, але для мяне ўсё было нібыта наэлектрызаванае», – кажа Лявон Вольскі.

За тыдзень прададзена больш за 1000 квіткоў на канцэрт Лявона Вольскага 21 верасня. Квіткі на танцпляц каштуюць 40 рублёў. Сядзячыя месцы: ад 40 да 48 руб. Продаж адбываецца праз касы і сістэму Kvitki.by, сайт Primehall.by і касы Prime Hall (ГЦ «Замак»). Інфалінія (033) 661 14 32.

Глядзіце таксама:

НМ, belsat.eu

Глядзі таксама
Каментары