Былы жыхар Барысава Аляксандр Малчанаў атрымаў узнагароду ва Украіне.
Сайт Ex-press.by паведамляе, што такім чынам хлопца адзначылі за ўдзел у баях на аўдзееўскім напрамку.
«Знаходзіўся ў прамзоне Аўдзееўкі з лістапада 2016-га па чэрвень 2017-га, удзельнічаў у баях за пазіцыю «Алмаз», наўпроставай наводкай біў з СПГ-9 (станкавы супрацьтанкавы гранатамёт – заўв.) па танку сепаратыстаў. Пасля прамзоны ўтрымліваў адну з адваяваных у баевікоў ДНР пазіцыяў у раёне данецкай фільтравальнай станцыі», – распавёў Аляксандр.
Аляксандр Малчанаў браў удзел у акцыі пратэсту 19 снежня 2010, адразу пасля прэзідэнцкіх выбараў. Яго абвінавацілі ва ўдзеле ў масавых беспарадках і ў абразе афіцыйнага сцягу, які ён сарваў з будынку КДБ.
2 сакавіка 2011 года суддзя Фрунзенскага суду Менску Таццяна Чаркас асудзіла Малчанава на тры гады зняволення ў калоніі ўзмоцненага рэжыму. Адбываў пакаранне ў калоніі № 15 Магілёва. Быў памілаваны Лукашэнкам, хаця прашэння аб памілаванні не пісаў.
Пасля вызвалення Малчанаў не мог уладкавацца на працу. Яго нікуды не бралі, нягледзячы на тое, што раней ён працаваў на Барысаўскім рамонтна-механічным заводзе, «Гідраўзмацняльніку» і БАТЭ.
Пазней Аляксандр Малчанаў пераехаў ва Украіну, дзе па кантракце ўступіў у рады Узброеных сіл гэтай краіны.
Медаль «За відвагу» («За Адвагу») – гэта недзяржаўная ўсеўкраінская ўзнагарода з асаблівым статусам. Ёй адзначаюць герояў АТА, якія ў складаных умовах службы даказалі сваю вернасць народу Украіны. Медалём узнагароджваюцца байцы і валанцёры за асабістую мужнасць і адвагу, праяўленыя ў гарачых кропках АТА.
Глядзіце таксама:
НМ, belsat.eu, паводле Ex-press.by, фотаздымкі з «Facebook» Аляксандр Малчанава
