У Светлагорску міліцыя, камунальнікі і ідэолаг намагаліся перашкодзіць аднавіць крыж па ахвярах сталінізму


Аднаўленне крыжа па ахвярах сталінскіх рэпрэсіяў не спадабалася дзяржаўнаму ідэолагу Беларусі, міліцыі ды камунальнікам.

Фота spring96.org
Фота spring96.org

Акцыя па аднаўленню крыжа, усталяванага ў памяць ахвяраў сталінскіх рэпрэсіяў, прайшла 1 снежня ў Светлагорску з ініцыятывы грамадскіх актывістаў ды пры пільнай увазе органаў. На старых могілках крыж у памяць ахвяр сталінізму быў усталяваны яшчэ ў 1992 годзе з ініцыятывы грамадскасці, інфармуе сайт праваабарончага цэнтру «Вясна».

Ушанаванне памяці ахвяр рэпрэсіяў у 1992 годзе было афіцыйным – з адпаведным рашэннем райвыканкаму і публікацыяй у раённай газеце. Але крыж знік, і грамадскасць вырашыла вырабіць новы, і ўсталяваць на яго «законнае» месца, вызначанае ў 1992 годзе рашэннем райвыканкаму.

Як толькі актывісты пачалі ўсталёўваць крыж, тут жа з’явілася міліцыя з прэтэнзіямі, што на могілках капаць забаронена.

«Мы паказалі пастанову райвыканкаму, і міліцыя пайшла. Але прыйшлі супрацоўнікі ЖКГ, якія таксама патрабавалі спыніць усталяванне крыжа, матывуючы, што гэта іх тэрыторыя – могілкі, і без іх дазволу нічога рабіць нельга. Але пайшлі і камунальныя службы, – а прыйшла ідэолаг, якая проста ў твар мне тыцкала пастановай Савету Міністраў, што без дазволу мясцовых органаў нельга будаваць ці ўсталёўваць культавыя збудаванні, помнікі, крыжы», – пракаментаваў грамадскі актывіст Юрый Ляшэнка.

Ён патлумачыў ідэолагу, што нічога супрацьзаконнага актывісты не робяць, а ўлады, якія выдавалі рашэнне аб усталяванні крыжа ў 1992 годзе, павінны былі сачыць за тым, каб гэты помнік захаваўся. Тут жа на могілках ёсць помнік ахвярам Вялікай Айчыннай вайны – яго ўлады даглядаюць.

У выніку крыж быў усталяваны і асвечаны праваслаўным святаром. Ідэолаг жа сышла, дадаўшы: «Я вас папярэдзіла».

МЯ, паводле spring96.org.

Глядзі таксама
Каментары