Дэфіцыту прэзерватываў на расейскім рынку не ўзнікне, запэўніваюць у «Расздароўнаглядзе».
«Расздароўнагляд» забараніў у Расеі продаж прэзерватываў «Durex» праз праблемы з перарэгістрацыяй прадукцыі, заявіў кіраўнік расейскага ведамства Міхаіл Мурашка.
«Яны не зарэгістраваныя ва ўстаноўленым парадку. У адпаведнасці з заканадаўствам медычныя вырабы мусяць прайсці выпрабаванні тэхнічныя, таксікалагічныя, і ўсё гэта мусіць прайсці экспертызу ў «Расздароўнаглядзе», – цытуе Мурашку агенцтва ТАСС.
Чыноўнік запэўніў, што дэфіцыту прэзерватываў на расейскім рынку не ўзнікне.
«Зарэгістравана ў Расеі больш за 60 найменняў прэзерватываў, таму ніякіх перабояў не будзе, гэта толькі адна з гандлёвых марак», – адзначыў Мурашка.
У «Durex» ёсць яшчэ шанец вярнуцца на расейскі рынак пасля правядзення рэгістрацыйных працэдураў, сказаў кіраўнік «Расздароўнагляду».
Раней у медыях зʼявіліся паведамленні, што прэзерватывы «Durex» з мінулага месяца не прадаюцца ў расейскіх крамах.
Паводле агенцтва РИА «Новости», «Durex» – адзін з лідараў расейскага рынку, на кампанію прыпадаюць 25 % абʼёму продажаў прэзерватываў у Расеі, яшчэ 40 % у «Contex» і каля 10 % у «Vizit».
МЯ, паводле bbc.com
