Міністэрства культуры Пермскага краю арганізавала свята кідання высушаных каровіных фекаліяў.
«Арганізатары свята «Вясёлы каравяк» ставяць перад сабой мэту спрыяць адраджэнню расейскай вёскі, яе традыцыяў, павазе да яе вытокаў», – паведамляе Міністэрства культуры Пермскага краю.
Арганізатары гэтага незвычайнага фестывалю тры месяцы збіралі і сушылі каровіны ляпёхі. Непагода, якая можа быць пагрозай для турнірных снарадаў, не ў стане зламіць энтузіязму. «Нічога ў нас не прамокне», – сцвярджаюць яны.
Упершыню спаборніцтвы па кіданні каровіных ляпёхаў прайшлі ў вёсцы Крылова ў 2009 г. На мінулы фестываль прыехалі каля 1500 чалавек.
Сярод іншых забаваў у рамках фестывалю запланаваныя спаборніцтвы па бегу з каромыслам і гонкі на мотаблоках.
«З нагоды 70-годдзя Вялікай Айчыннай вайны ў праграме фестывалю адбудзецца паказ літаратурна-музычных кампазіцыяў, пра тое, як працаўнікі тылу працавалі на карысць Перамогі, а пасля адпачывалі ў сваіх вёсках», – адзначаецца ў прэс-рэлізе пермскага Міністэрства культуры.
ЮВ, belsat.eu