У партнёраў Uber у Менску забіраюць ліцэнзіі. Тыя збіраюцца судзіцца


Фота biz.liga.net

Ліцэнзія адной з кампаній-перавознікаў, якая супрацоўнічала з сэрвісам Uber, ужо спыненая. Дакументы аб пазбаўленні ліцэнзіі другой фірмы чакаюць свайго часу.

Пад кантрольны закуп патрапілі і іншыя перавознікі, якія супрацоўнічалі з сэрвісам. «Іх [прадстаўнікоў Uber] схема няправільная і непрыдатная для нашага рынку», – лічаць у Транспартнай інспекцыі і тлумачаць, як сэрвіс зможа працаваць у нашай краіне без парушэнняў заканадаўства і чаму «пад раздачу» патрапіў толькі Uber – а «Яндэкс. Таксі», напрыклад, абсалютна легальна працягне працаваць.

Даручэнне «вывучыць сітуацыю з Uber яшчэ 8 лютага даў старшыня гарвыканкаму Менску Андрэй Шорац. На думку сталічных таксістаў, прыход бюджэтнага Uber на беларускі рынак паставіў іх у няроўныя ўмовы з кіроўцамі, якія працавалі з гэтым сэрвісам. Міністэрства транспарту ўжо 25 лютага спыніла дзеянне ліцэнзіі аднаго з асноўных партнёраў Uber – прадпрыемства «Молберг».

«Гэта не часовая прыпыненне, а поўнае спыненне дзеяння спецыяльнага дазволу (ліцэнзіі) – такую захаду выкарысталі за грубыя парушэнні перавознікам дзейнага заканадаўства», – растлумачыў начальнік упраўлення кантролю транспартнай дзейнасці Транспартнай інспекцыі Мінтрансу Іван Алісейка.

Транспартнікі правялі «мэтавыя тэматычныя пазапланавыя аператыўныя праверкі дзейнасці кампаніяў-партнёраў Uber», выявіўшы адсутнасць замовы-нарада на фрахтаванне транспартнага сродку ды не пройдзены перавознікамі раз у 6 месяцаў дзяржаўны тэхнічны агляд (як гэта рэгламентуе заканадаўства для легкавых аўтамабіляў, якія займаюцца камерцыйнымі перавозкамі пасажыраў).

Алісейка тлумачыць: у Беларусі магчымыя два віды камерцыйных пасажырскіх перавозак – рэгулярныя і нерэгулярныя (у тым ліку і таксі). Апошнія магчымыя на наступных умовах: гэта альбо публічная дамова (так працуюць усе «традыцыйныя» службы таксі), альбо дамова фрахтавання транспартнага сродку (гэтак званая замова-нарад, гэтак працуе, напрыклад, арэнда аўто з кіроўцам). Больш за тое, усе аўтамабілі масай менш за 5 тон, якія ажыццяўляюць камерцыйныя перавозкі пасажыраў, абавязаныя ездзіць з жоўтымі нумарамі і праходзіць тэхагляд двойчы ў год, нават калі яны не лічаць сябе таксі, падкрэсліваюць у Транспартнай інспекцыі Мінтрансу.

«Маршруткі, напрыклад, таксама не зʼяўляюцца таксі, аднак яны робяць камерцыйныя перавозкі пасажыраў і падпарадкоўваюцца тым жа правілам», – заўважыў Алісейка.

Наколькі вядома Auto.tut.by, для праверак выканання заканадаўства транспартнікі правяралі не канкрэтных перавознікаў, а ўсю сістэму. Парушэнні зафіксавалі пакуль толькі ў тых, хто «трапіў» пад кантрольны закуп – пакуль гэта прыватнае гандлёвае ўнітарнае прадпрыемства «Молберг» і абʼяднанне з абмежаванай адказнасцю «Белеврорент Флит Солюшнз»: дакументы адносна спынення дзеяння ліцэнзіі другога перавозніка ўжо накіраваныя выканаўцамі (супрацоўнікамі філіялу Транспартнай інспекцыі па Менску і Менскай вобласці) у Транспартную інспекцыю, але, па словах Івана Алісейкі, пакуль не разглядаліся. Праверачныя мерапрыемствы, кажуць транспартнікі, будуць працягвацца.

Да канкурэнтнага з Uber сэрвісу, які нядаўна прыйшоў на наш рынак – «Яндэкс. Таксі» – прэтэнзіяў няма: тыя працуюць паводле іншага прынцыпу – выбралі сабе ў якасці партнёра службу таксі 135 «Сталіца», з якой працуе больш за 100 прадпрыемстваў-перавознікаў і ІП. Усе іх машыны – традыцыйныя таксі: ездзяць з жоўтымі нумарамі і двойчы ў год праходзяць тэхагляд.

Пасля рашэння аб спыненні дзеяння ліцэнзіі ў перавозніка ёсць 15 рабочых дзён на тое, каб скончыць дзейнасць. Да таго ён цалкам легальна можа працаваць – што і робіць цяпер, да прыкладу, «Молберг».

«Праводзіцца масіраваная інфармацыйная кампанія супраць Uber, ініцыяваная гульцамі, не зацікаўленымі ў зʼяўленні сэрвісу, які чыніць абсалютна празрыстымі фінансавыя патокі ў сферы перавозак», – упэўненая прадстаўніцы Uber у Беларусі Яўгенія Шыпова.

Перавозкі праз сэрвіс Uber – гэта не таксі: гэта арэнда аўтамабіля з кіроўцам на кароткі час, кажуць прадстаўнікі сэрвісу. «Запыт на паездку размяшчаецца выключна ў лічбавым выглядзе карыстальнікам прыкладання. З гэтай жа прычыны на нас не распаўсюджваюцца патрабаванні, што прадʼяўляюцца да аўтамабіляў таксі, – у нас няма абавязковага абклейвання, жоўтых нумароў і іншых атрыбутаў, якія патрэбныя ў таксі. Тэхагляд і выплату дарожнага збору кіроўцы – партнёры Uber праходзяць раз у год ці два (у залежнасці ад года выпуску аўтамабіля): на паслугу арэнды аўто з кіроўцам не распаўсюджваецца патрабаванне аб праходжанні тэхагляду двойчы ў год, роўна як патрабаванне аб заключэнні дамовы на адрозных ад іншых аўтааматараў умовах», – падкрэсліваюць прадстаўнікі Uber.

МЯ, паводле auto.tut.by

Глядзі таксама
Каментары