У нядзелю ўвечары на мяжы затрымлівалі валанцёрку праваабарончага цэнтру «Вясна»
Анісія Казлюк вярталася ў Беларусь з праваабарончага форуму ў Вільні ўвечары 22 кастрычніка. Яна з’яўляецца актывісткай праваабарончага цэнтру «Вясна». На мяжы яе пратрымалі некалькі гадзінаў, а потым адпусцілі дадому.
Падчас агляду на мяжы былі ўважліва правераныя асабістыя рэчы, асаблівую цікавасць выклікала кніга Алеся Бяляцкага. Памежнікі распытвалі дзяўчыну аб тым, што рабіла ў Вільні, чым займаецца цяпер.
«У вас свая складаная праца, а ў нас свая» – вымавіў мне на развітанне старэйшы лейтэнант. А кнігу мне ўсё ж вярнулі» – распавяла валанцёрка.
Памежнікі зрабілі копію пашпарту Анісіі Казлюк і адпусцілі.
20-21 кастрычніка ў Вільні праходзіў IV Беларускі праваабарончы форум, дзе бралі ўдзел каля 140 асобаў з розных праваабарончых арганізацыяў Беларусі, а таксама асобныя эксперты. На форуме абмяркоўваліся рэпрэсіі супраць праваабаронцаў, палітычных актывістаў і іншыя парушэнні правоў чалавека ў Беларусі.
26 верасня ў Менску адбыліся ператрусы ў сацыяльных актывістаў, у тым ліку і ў доме Анісіі Казлюк.
ВЧ, belsat.eu
