Абноўлена. Увечары 30 чэрвеня Леанід Кулакоў паведаміў нашаму сайту, што ў Курапатах міліцыянты склалі на яго два пратаколы.
Вользе Мікалайчык у судзе далі 10 содняў адміністрацыйнага арышту, Барыса Анікеева вызвалілі.
У каментары Belsat.eu Барыс Анікееў распавёў, што яго пратрымалі каля 5 гадзінаў «без аніякіх пастановаў»:
«Мне зусім нічога не сказалі. Я спытаў: за што затрымлівалі».
Паўла Севярынца судзілі за парушэнне парадку правядзення масавых мерапрыемстваў, непадпарадкаванне міліцыянтам, дробнае хуліганства і парушэнне ПДР. У выніку палітыку прызначылі 10 содняў адміністрацыйнага арышту.
30 чэрвеня міліцыя затрымала Барыса Анікеева, Вольгу Мікалайчык, Паўла Севярынца і Дзяніса Урбановіча.
Паўла Севярынца АМАП затрымаў, калі той выходзіў з крамы. Цяпер сустаршыня Беларускай хрысціянскай дэмакратыі знаходзіцца ў судзе Фрунзенскага раёну Менска і чакае на адваката. Актывіста і аднаго з найбольш актыўных удзельнікаў пратэстаў пад рэстарацыяй «Поедем поедим» могуць пасадзіць «на суткі».
Вядома, што раніцай у суботу міліцыя затрымала яшчэ траіх актывістаў – Барыса Анікеева, Вольгу Мікалайчык і Дзяніса Урбановіча.
«Анікееў і Урбановіч начавалі ў Вольгі Мікалайчык. Сёння чарга «Еўрапейскай Беларусі» несці вахту ў Курапатах, яны збіраліся выязджаць – іх усіх траіх і затрымалі каля дому Мікалайчык. Дзе яны – не маю панятку», – заявіў «Белсату» адзін з абаронцаў Курапатаў Леанід Кулакоў.
Ужо месяц у Курапатах пад лозунгам «Не кабак, а музей» праходзіць акцыя пратэсту супраць адкрыцця тут рэстарацыі.
Улады ціснуць на найбольш актыўных пратэстоўцаў. Гэтак, учора да аднаго з іх, цесляра Змітра Дашкевіча прыйшлі працаўнікі Аддзелу па барацьбе з эканамічнымі злачынствамі. Дашкевіч хацеў са сваймі партнёрамі па бізнесе паставіць у Курапатах 12 крыжоў, але раніцай іх затрымалі непадалёк ад урочышча. Прадпрымальніка падазраюць у «парушэнні правілаў гандлю і аказання паслугаў насельніцтву».
Курапаты – лес на паўночным усходзе Менску, месца масавых расстрэлаў у сталінскія часы. Паводле даследчыкаў, там загінула ад 30 да 250 тысяч чалавек.
ДД
