«Людзі беглі, а пасля пачалі падаць. З неба пачалі падаць кавалкі бетону і цэглы. Усё было ў агні, усё выбухала», – распавядаюць відавочцы пра інцыдэнт, які здарыўся 20 снежня на кірмашы Сан-Пабліто ў 30 кіламетрах ад Мехіка.
У момант выбуху на кірмашы знаходзілася каля двух тысячаў асобаў. Цяпер вядома пра 31 ахвяру, яшчэ 70 атрымалі раненні. Каля 13 дзяцей, якія атрымалі апёкі больш за 90% паверхні цела, адправілі ў Тэхас на лячэнне.
Пасля першага выбуху піратэхніка дэтанавала больш за гадзіну. Большая частка прылаўкаў і крамаў разбураная. Усё навокал пакрытае попелам і абломкамі.
Адной з верагодных прычынаў выбуху паліцыя лічыць недастатковыя захады бяспекі на рынку. Шмат жыхароў прыгараду зараблялі на вытворчасці піратэхнікі, і шмат хто рабіў яе ў падпольных майстэрнях. Паводле мясцовых СМІ, у час выбуху на рынку было 300 тонаў выбухоўкі.
На месцы працуюць ратавальнікі і следчыя, якія расследуюць катастрофу. Паводле мясцовых уладаў, колькасць ахвяр можа павялічыцца.
Прэзідэнт Мексікі Пенья Ньета ў твітэры выказаў спачуванні родным і блізкім загінулых і паабяцаў пакараць вінаватых.
Сан-Пабліто – самы буйны і найбольш вядомы рынак феерверкаў у Мексіцы. Раней тут ужо здараліся выбухі – у 2005 і 2006 гадах.
ДР, belsat.eu
