У Лондане асвяцілі беларускую царкву

photo

У суботу, 17-га снежня, у Лондане асвяцілі новазбудаваную грэка-каталіцкую царкву святога Кірылы Тураўскага і Усіх святых заступнікаў беларускага народу.

Беларуская ўніяцкая царква – першая драўляная святыня ў брытанскай сталіцы з часоў вялікага лонданскага пажару 1666 года.

Асвячэнне беларускай царквы ў Лондане

Прычашчэнне вернікаў

На асвячэнне царквы прыбылі апостальскі нунцый у Вялікай Брытаніі архібіскуп Антоніо Меніні ды біскуп Глеб Ланчына – галава Украінскай грэка-каталіцкай епархіі Святой Сямʼі ў Лондане, апостальскі візітатар для грэка-каталікоў у Беларусі Сяргей Гаек, беларускае рыма-каталіцкае і грэка-каталіцкае духавенства, прадстаўнікі беларускай дыяспары ў Брытаніі, а таксама вернікі з Беларусі.

Унучка Якуба Коласа Марыя Міцкевіч распавяла пасля літургіі пра дзейнасць дзіцячага фонду «Сакавік», паведаміў у сваім «Фэйсбуку» беларускі святар Сяргей Сурыновіч.

Айцец Сяргей Стасевіч і ўнучка Якуба Коласа Марыя Міцкевіч

Беларуская царква ў Лондане звонку

Унутры царквы

Царква святога Кірылы Тураўскага і Усіх святых заступнікаў беларускага народу – мемарыял ахвярам атамнай катастрофы 1986 года ў Чарнобылі. Яна размешчаная побач з Марыян Хаўзам – будынкам, з якога пачыналася гісторыя Беларускай каталіцкай місіі ў 1946 годзе, насупраць Беларуская бібліятэкі і музею імя Францішка Скарыны, заснаваных у Лондане беларускімі ўніяцкімі святарамі.

Архітэктар праекту – малады лонданскі архітэктар кітайскага паходжання Цзыўай Рафаэль Со, які з’яўляецца грэка-католікам і цікавіцца беларускай культурай.

Пабудова царквы была вялікай марай шматгадовага кіраўніка беларускай каталіцкай місіі айца Аляксандра Надсана, рэалізацыю якой рупліва працягваў айцец Сяргей Стасевіч, адказны за душпастырства беларускіх грэка-каталікоў у Лондане.

МЯ, belsat. Фота з «Фэйсбуку» айца Сяргея Сурыновіча

Глядзі таксама
Каментары