Былы прэзідэнт Францыі Нікаля Сарказі затрыманы па справе аб фінансаванні ягонай выбарчай кампаніі 2007 года, паведамляе «Le Monde».
Раніцай 20 сакавіка Сарказі прыйшоў на допыт па гэтай справе ў крымінальную паліцыю французскага Нантэра (адзін з найбуйнейшых прыгарадаў Парыжа), дзе быў узяты пад варту.
У праваахоўных органаў ёсць 48 гадзін, каб вызначыцца з мерай стрымання ў дачыненні да былога прэзідэнта.
Нікаля Сарказі быў прэзідэнтам Францыі з 2007 па 2012 год. На выбарах у 2012 годзе ён прайграў кандыдату ад Сацыялістычнай партыі Франсуа Алянду.
У 2011 годзе сын былога лідара Лівіі Муамара Кадафі Саіф-аль-Іслам заявіў, што ягоны бацька быў спонсарам выбарчай кампаніі Сарказі, выдаткаваўшы на яе больш за € 50 млн. У сакавіку 2012 года выданне «Mediapart» апублікавала дакументы пра сувязі Кадафі з Сарказі. Прэзідэнт назваў іх фальшыўкай.
€ 50 млн на перадвыбарчую кампанію Сарказі нібыта адмылі праз панамскія і швейцарскія банкаўскія рахункі сястры прыхільніка экс-прэзідэнта.
У 2011 годзе ў Лівіі пачаліся пратэсты, якія перараслі ў грамадзянскую вайну. Узброены канфлікт скончыўся перамогаю паўстанцаў (падтрымліваліся ЗША, ЕЗ і Лігай арабскіх дзяржаў). 20 кастрычніка 2011 года паўстанцы ўзялі ў палон кіраўніка Лівіі Муамара Кадафі, а пазней забілі яго. Кадафі кіраваў Лівіяй з 1969 года.
ЮВ, belsat.eu