У Беларусі – новы прысуд вайскоўцу. Гэта ўжо сёмы выпадак за 2,5 месяца

ВІДЭА

Суд Барысаўскага раёну вынес 6 чэрвеня чарговы прысуд у дачыненні да ваеннаслужачага з Печаў, які абвінавачваецца ў здзяйсненні вайсковых злачынстваў.

Як паведамляе сайт Вярхоўнага Суду, сяржант К. (яго імя і прозвішча не называюцца) прызнаны вінаватым у неаднаразовым атрыманні хабараў (ч. 1 і 2 арт. 430 КК), злоўжыванні ўладай (ч.2 арт.455 КК) і парушэнні парадку нясення ўнутранай службы (арт. 454 КК). Яго прысудзілі да пазбаўлення волі на тэрмін 3 гады 6 месяцаў з адбываннем у папраўчай калоніі ва ўмовах узмоцненага рэжыму, з канфіскацыяй маёмасці.

Гэта ўжо мінімум сёмы прысуд ваеннаслужачаму ў Беларусі за апошнія некалькі месяцаў.

  • 4 і 18 траўня суд Барысаўскага раёну выносіў прысуды двум сяржантам з Печаў – абодва атрымалі па 3 гады пазбаўлення волі;
  • 3 траўня ў Горадні за дзедаўшчыну былі асуджаныя сяржант Уладзіслаў Ялец (4 гады калоніі) і яфрэйтар Максім Малышко (3,5 года);
  • 29 сакавіка суд Барысаўскага раёну пакараў былога начальніка фізічнай падрыхтоўкі 72-га вучэбнага цэнтру ў Печах, падпалкоўніка Дзмітрыя Кіселара 4 гадамі пазбаўлення волі ў калоніі ва ўмовах узмоцненага рэжыму;
  • 30 сакавіка да 5 гадоў пазбаўлення волі быў прысуджаны прапаршчык Ігар Хішчанка з Печаў – за гвалт і здзекі над жаўнерамі ды хабарніцтва.

Нагадаем, пасля гібелі ў Печах жаўнера Аляксандра Коржыча былі распачатыя шэраг крымінальных справаў за дзедаўшчыну ў дачыненні да сяржантаў і афіцэраў. Аднак гэтыя судовыя працэсы ніяк не звязаныя са смерцю Коржыча – справа аб яго гібелі вынесена ў асобную вытворчасць.

Паводле Следчага камітэту, Коржыча не забілі, але давялі да самазабойства, і вінаватыя ў гэтым тры сяржанты. Сваякі жаўнера з высновамі следства не згодныя.

ІІ, belsat.eu

Глядзі таксама
Каментары